لە ڕۆژانی 11/ 5 تا 14/ 5/ 2017 لە ماڵتا خولێکی دیکەی هێڵی دووی دیپلۆماسی لەسەر پرسە گەرم و هەنووکەییەکانی ڕۆهەڵاتی ناوەراست، بەرێوە دەچێت، كه‌ هێمن هەورامی، بەرپرسی کاروباری سیاسی و پەیوەندییە گشتییەکانی مەکتەبی سەرۆکى هه‌رێمى كوردستان، بەشداری ئەو خولە دەبێت.

بەشداربووانى خوله‌كه‌، تێکەڵەیەکن لە کەسانی دیپلۆماسی و خەڵکانی ئەکادیمی نزیک لە بڕیار به‌ده‌ستانى سیاسی وڵاتانی خۆیان، لەوانە بریکاری وەزیری دەرەوەی ئێران و دیپلۆماتكارانی سعوودیە و ئوردن و ئیمارات و میسڕیان له‌نێودایه‌، هه‌روه‌ها بەرپرسی نوسینگەی حەیدەر عیبادی و بەرپرسی ئەکادیمیای دیپلۆماتی تورکیا و ئەندامی ئەنجوومەنی پەیوەندی نیودەوڵەتی ڕووسیا و ژمارەیەک ئەکادیمی و دیپلۆماتی پێشووی ئەمریکا بەشدارن.

به‌پێی ڕاگه‌یاندراوێك، وا بڕیارە لە دانیشتنی سێیەم و تایبەت بە پرسی عێراق، هێمن هەورامی، بەرپرسی کاروباری سیاسی و پەیوەندییە گشتییەکانی مەکتەبی سەرۆکى هه‌رێم، لەسەر پرسی سەربەخۆیی و ڕیفراندۆم و سیاسەتی سەرۆک بارزانی و سەرکردایەتی سیاسی کوردستان بابەتێک پێشکەش بکات.

هێمن هەورامی، ڕایگەیاند، لەم خولە ئەو بابەت و پرسانە تاوتوێ دەکات کە بەرۆکی ڕۆژهەڵاتی ناوەڕاستی گرتووە. لەو نێوەندەشدا بەهۆی کاریگەری هەرێمی کوردستان و ڕۆڵی سەرۆک بارزانی لە پرسەکاندا و بەتایبەتی پرسی تیرۆر و ئایندەی ڕۆژهەڵاتی ناوەڕاست و پرسی سەربەخۆیی هەرێمی کوردستان.








باسنيوز