بەڕێوەبەرایەتیی ئەوقافی سۆران و لقی سۆرانی یەکێتیی زانایانی ئایینیی ئیسلامیی کوردستان، لە ژێر دروشمی (برینی ئەنفال بە سەربەخۆی کوردستان سارێژ دەبێ) لە مزگەوتی سەروەران مەراسیمێکی یادکردنەوەیان ساز کرد.

وەیسی سەعید وەیسی، بەڕێوەبەری ئەوقافی سۆران، ڕایگەیاند: "ئەمڕۆ پێنجشەممە 13/4/2017 لە ساڵیادی کارەساتی ئەنفال، کە 29 ساڵ بەر لە ئێستا ڕژێمی بەعسی لەناوچوو بەمەبەستی سڕینەوەی ناسنامە و کولتووری گەلی کورد، لەژێر ناوی سوورەتێکی قورئانی پیرۆز، دوور لە ھەموو بەھا ئایینی و ئینسانییەکان دەرحەق بە گەلی کوردستانی ئەنجامی دا، کە ھەمیشە ئایین پەروەری و ئیسلام دۆستی لە سەرووی ھەموو پیرۆزییەکانی ژیانیانە کە ئەمەش پێچەوانەی پرەنسیپەکانی ئایینی ئیسلامە، چونکە لە دیدی ئیسلامدا، ھیچ کات مرۆڤ ئەنفال و قەتل و عام ناکرێت، کە بەداخەوە ئەوکات جیھانی ئیسلامی ھەڵوێستیان نەبوو و بێ دەنگ بوون لە ئاست ئەو زوڵم و ستەمەی بەرامبەر گەلی کورد دەکرا".

گوتیشی: "خەڵکی کوردستان ئامادەسازی بۆ ئەنجامدانی ڕیفراندۆم دەکەن، کە سەرەتایەکە بۆ سەربەخۆیی کوردستان، کە سارێژی برینی ئەنفال و ھەموو ئێش و ئازارەکان تەنیا سەربەخۆییە، ھەروەک بەناوی مامۆستایانی ئایینی دووپاتی پاڵپشتی و پشتیوانی مامۆستایانی ئایینی دووپات دەکەمەوە، بۆ ھەنگاوەکانی مەسعود بارزانی، سەرۆکی ھەرێمی کوردستان، بۆ ڕیفراندۆم".

بەڕێوەبەری ئەوقافی سۆران داواشی لە لایەنە سیاسییەکان کرد: "لە ئاستی ھەستیاریی قۆناغەکەدا بن و ھەوڵی سەرخستنی ڕیفراندۆم بدەن، تا لە سایەیدا بە ئاشتییانە ببینە خاوەن دەوڵەتی سەربەخۆ".

دواتر مەلا خالید مەلەکی، بەرپرسی لقی سۆرانی یەکێتیی زانایان، وەک وەڵامدانەوەیەک بۆ دوژمنانی کورد، گوتی: "ھیچ کارەساتێک ناتوانێ کورد لەناوبەرێت، ئەمڕۆش لە مزگەوتی سەروەران ئاڵای کوردستانی ھەڵکرا".

لەکۆتایشدا لەلایەن قوتابیانی ئایینی بەھەمان بۆنەوە چەندین پارچە شیعر و پەخشان خوێندرانەوە، کە گوزارشتیان لە خۆشەویستیی کوردستان، ئاڵا، پێشمەرگە و شەھیدان دەکرد، ھەر بەھەمان بۆنەوە وەک گوزارشتێک لە 29 ساڵەی کارەساتی ئەنفال، 29 نەمام چێنران و بە خوێندنەوەی چەند نزایەک بۆ سەربەرخۆیی کوردستان و سەرکەوتنی پێشمەرگە کۆتایی بە مەراسیمەکە ھات.













باسنیوز