سەرپەرشتی سەید ئەحمەد بەزنجی، یاریدەدەری جەلال تاڵەبانی، سرکتێری گشتیی یەکێتیی نیشتمانیی کوردستان، یادی ١٤ ساڵەی شەھیدبوونی ئایەتولڵا سەید محەمەد باقر ئەلحەکیم، کرایەوە.



ئەمڕۆ چوارشەممە 5/4/2017 لە مزگەوتی حوسێنیەی شاری سلێمانی، بەئامادەبوونی بەرپرسانی باڵای حزبی و حکوومی مەڕاسیمی شەھیدبوونی ئایەتولڵا محەمەد باقر ئەلحەکیم، بەڕێوەچوو.


لە مەڕاسیمی یادەکەشدا باس لە پەیوەندی مێژووی نێوان گەلی کورد و ئایەتولڵا محەمەد باقر ئەلحەکیم کرا، بە دۆستێکی
دێرینی گەلی کورد ناسێنرا.



عەتا شێخ حەسەن، ئەندامی ئەنجومەنی سەرکردایەتیی پارتی دیموکراتیی کوردستان، لە پارێزگای سلێمانی، لەمیانی پێشکەشکردنی گوتارێکدا، ڕای گەیاند: "خوالێخۆشبوو محەمەد باقر ئەلحەکیم، لەسەر ڕێبازی باوکی شەھیدی، ھەستێکی برایانەی بۆ گەلی کورد ھەبووە و پەیوەندی بەھێزی بە جوڵانەوەی بزاڤی ڕزگاری خوازی گەلی کورد ھەبووە، بەتایبەتی پەیوەندی لەگەڵ جەنابی بارزانی نەمر و جەنابی مەسعود بارزانی، سەرۆکی ھەرێمی کوردستان و بنەماڵەکەیەوە ھەبووە".


گوتیشی: "ئایەتولڵا محەمەد باقر ئەلحەکیم، ھەمیشە داکۆکیکار بووە لە مافەڕەواکانی گەلی کورد و شۆڕشە ڕەواکەی، بۆیە ئێمەی گەلی کورد ھەرگیز فەتوای سەرمەرجەعی گەورەی شەھید سەید محەمەد باقر ئەلحەکیم لەیاد ناکەین، کە کوشتنی شۆڕشگێڕانی گەلی کوردی بەدەستی خوێن خۆرەکانی بەعسی حەرام کردووە و ڕێگەی نەدا بەناوی ئایینەوە کوردستان وێران بکرێت و گەلی کورد لەناو بچێت، ھەروەھا لەکاتی شۆڕشی ئەیلولدا ئاێەتولڵا باقر ئەلحەکیم، فتوای ئەوەیدا ھەر سەربازێک لە شەڕی دژی کورد بکوژرێت، بە شەھید ھەژمار ناکرێت".
bas news -