وه‌زاره‌تى ناوخۆى حكوومه‌تى هه‌رێمى كوردستان، له‌ ڕێگه‌ى هاتوچۆى شاره‌كانه‌وه‌، ئامارێكى ئۆتۆمبیله‌ بێ پێشینه‌كان ئاماده‌ ده‌كات بۆ ئه‌وه‌ى له‌كاتى پێویستدا، پشتى پێ ببه‌سترێت.



خۆشناو حه‌سه‌ن، گوته‌بێژى پۆلیسى هاتوچۆى ڕاپه‌ڕین، له‌ لێدوانێكدا به‌ (باسنیوز) ى ڕاگه‌یاند :" بڕیارێكمان له‌ به‌ڕێوه‌به‌رایه‌تى گشتى پۆلیسى هاتوچۆى هه‌رێمى كوردستانه‌وه‌ بۆ هاتووه‌، ئه‌و ئۆتۆمبێلانه‌ی كه‌ (ژماره‌ كاتی)ن و ژماره‌ و پێشینه‌یان نییه‌، پێویسته‌ بچێته‌ تاقیگه‌ی پشكنینی ئۆتۆمبیل بۆ پشكنین ".



گوتیشى :" له‌كاتى پشكنینیاندا فۆرمیان بۆ پڕ ده‌كرێته‌وه‌ و وێنه‌یه‌كى فۆرمه‌كه‌یان پێده‌درێته‌وه‌ بۆ ئه‌وه‌ى له‌ بازگه‌ و مه‌فره‌زه‌كانى هاتوچۆ گرفتیان بۆ دروست نه‌بێت".



ڕونیشیكرده‌وه‌، كه‌ له‌ قۆناغى سه‌ره‌تادا گرنگى ئه‌و كاره‌ ته‌نها بۆ ئه‌وه‌یه‌ بزانرێت چه‌ند ئۆتۆمبیلى له‌و جۆره‌ له‌ هه‌رێمى كوردستاندا هه‌یه‌، و سوود له‌ ئاماره‌كه‌ وه‌ربگیرێت.
bas news -