- بەرپرسی ڕزگارکردنی کوردانی ئێزدی دەڵێ، دوێنێ سێ کەسی دیکەیان لە دەستی داعش ڕزگار کردووە و ئێستا ئاماری ڕزگارکردنی کوردانی ئێزدی لە دەستی داعش گەیشتووەتە دوو هەزار و ٩١٨ کەس.

بەرپرسی نووسینگەی ڕزگارکردنی کوردانی ئێزدی، (حوسێن قایدی)، بە ماڵپەڕی فەرمیی پارتی دیموکراتی کوردستانی ڕاگەیاند: ''دوێنێ سێ کەسی دیکە لە پارێزگای مووسڵ ڕزگار کران، کە دوو منداڵی تەمەن شەش ساڵ و چوار ساڵ و کچێکی ١٧ساڵ بوون و بە کەسوکاری خۆیان شاد بوونەتەوە.''

(حوسێن قایدی) گوتی، بەردەوامن لە ھەوڵەکانیان بۆ ڕزگارکردنی کوردانی ئێزدی لە دەستی داعش و تا ئێستا دوو ھەزار و ٩١٨ کەس ڕزگار کراون.

بەرپرسی نووسینگەی ڕزگارکردنی کوردانی ئێزدی دەڵێ: ''لەدوای دەستپێکردنی پرۆسەی ڕزگارکردنی مووسڵەوە تا ئێستا ٨٠ کەس ڕزگار کراون، بەڵام ڕزگارکردنی ھەموویان لەڕێی نووسینگەکەی ئێمەوە بووە و ھیچ کامیان لەڕێی ھێزە عێراقییەکانەوە نەبووە.''

سەبارەت بەو منداڵانەی کە کوردی ئیزدین و (پەکەکە) ڕفاندوونی، (حوسێن قایدی) دەڵێ: ''هەوڵ دەدەین ئەوانیش لەژێر دەستی (پەکەکە) ڕزگار بکەین، چونکە نابێ منداڵ چەکدار بکرێت و ستەمی وا لە ئێزدییان بکرێت و منداڵەکانیان بخرێنە شەڕەوە؛ بەگوێرەی یاسا نێودەوڵەتییەکانیش، نابێ منداڵ چەکدار بکرێت و بڕفێندرێت، بۆیە ئێمەش ئەوە قبووڵ ناکەین.''
kdp-