سەرۆکی بەرەی تورکمانی دەڵێت، پارتی کرێکارانی کوردستان، پەکەکە چەندین بارەگای لە ناوچە تورکمانشینەکانی سنووری پارێزگای کەرکووکدا کردووەتەوە و تورکمانەکانی ڕفاندووە و بوونەتە مایەی کێشە بۆ نێوان پێوەندی کورد و تورکمان بۆیە پێویستە پەکەکە وەدەر بنرێ.

ئەرشەد ساڵحی، لە کۆنگرەیەکی ڕۆژنامەڤانیدا لە کەرکووک ڕایگەیاند: "پەکەکە لە شارۆچکەی خورماتوو چەند چەکدارێکی تورکمانی ڕفاندووە و بوونەتە مایەی کێشە بۆ پەیوەندیی نێوان کورد و تورکمان لە ناوچەکە؛ بۆیە پێویستە ئەو ڕێکخراوە لە پارێزگای کەرکووک دەربکرێت و بارەگایان لێ دابخرێت".

سەرۆکی بەرەی تورکمانی لەبارەی پارتی کرێکارانی کوردستان پەکەکە لە کەرکووک ڕایگەیاند: "پەکەکە لە چەند ناوچەیەکی تورکمانشیندا بارەگای کردووەتەوە، هەروەها ڕۆڵێکی خراپی لە تێکدانی پەیوەندیی نێوان پێکهاتەکانی خورماتوو هەبووە و خەڵکیان ڕفاندووە." گوتیشی: "پێویستە بارەگای ڕێکخراوە تیرۆریستییەکان لە کەرکووک دوور بخرێنەوە".

سەرۆکی بەرەی تورکمانی، دەشڵێت: "پێویستە وەکچۆن ڕێکخراوی موجاهیدینی خەلق لە عێراق دەرکرا، پەکەکەیش لە عێراق دەربکرێت؛ نابێت لە شەڕی داعش پشت بە پەکەکە ببەسترێت، چونکە کەرکووک هێزی پێشمەرگەی لێیە و پێویستی بە پەکەکە نییە".














KDP