هەڵسووڕاوێکی پێشووی بزووتنەوەی گۆڕان ڕای گەیاند، ڕێکخەری گشتیی بزووتنەوەکە هەوڵ دەدات، یەکێتیی نیشتمانیی کوردستان بە هەموو باڵەکانیەوە هەڵبوەشێنێتەوە. دەشڵێت: ”بەدوای بەرژەوەندییەکانی خۆی کەوتووە“.

ئەمڕۆ شەممە 10\9\2016، کاروان ساڵح، هەڵسووڕاوی پێشووی گۆڕان و پەرلەمانتاری پێشووی ئەو بزووتنەوەیە لە پەرلەمانی کوردستان، ڕایگەیاند، لە سەرەتاوە نەوشیروان مستەفا، ڕێکخەری گشتیی بزووتنەوەی گۆڕان، زۆر دژی (کۆسرەت ڕەسول عەلی و بەرهەم ئەحمەد ساڵح)، جێگرانی سکرتێری گشتیی یەکێتی کردووە و ”لە ڕابردووشدا زۆر شتی کردووە و بە جددی دژایەتی ئەو دوو باڵەی یەکێتی کردووە“.

ئەوەشی ڕوون کردەوە: ”ڕێکخەری گشتیی گۆڕان بۆ بەرژەوەندیی خۆی و بزووتنەوەکەی، بۆ ئەوەی بەرژەوەندییەکانی بپارێزێت، دەزانێت باڵی دەستڕۆیشتوو سەقامگیریی زیاتری هەیە و ناوچەی سلێمانی زیاتر لە دەسەڵات و لەسەر دەستی ئەوانە، پشتیوانییان دەکات“. گوتیشی: ”ئەو بە هەموو شێوەیەک هەوڵی ئەوە دەدات کە لە پەرتەوازەیی و ململانێی یەکێتیدا سوودمەند بێت، بۆ خۆی گۆڕەپانەکە کۆنتڕۆڵ بکات و ببێتە خاوەنی، بۆ ئەوەی خەونەکانی پێشووی بێتە دی“.





باسنیوز