د.فوئاد مەعسوم، سەرۆک کۆماری عیراق، لەگەڵ هێرۆ ئیبراهیم ئەحمەد، ئەندامی مەکتەبی سیاسیی یەکێتی کۆدەبێتەوە و پێشنیاری خۆی لەسەر کێشەکانی ناو یەکێتی دەخاتەڕوو.

ئەمڕۆ چوارشەممە 7\9\2016، د.فوئاد مەعسوم، سەرۆک کۆماری عێراق و ئەندامی مەکتەبی سیاسیی یەکێتیی نیشتمانیی کوردستان، لەگەڵ ھێرۆ ئیبراھیم ئەحمەد، بەرپرسی یەکەمی باڵی دەستڕۆیشتووی یەکێتی کە خۆیان بە (زۆرینەی مەکتەبی سیاسیی یەکێتی) دەزانن و ناوەندی بڕیار بە (باڵی قۆرخکار) وەسفیان دەکات، هەروەها لەگەڵ مەلا بەختیار کۆبوویەوە، ڕاگەیاندنی فەرمیی یەکێتیش، لەو بارەیەوە ئاماژە بەوە دەدات کە ئامانج لە سەردانەکەی مەعسوم، دوایین ھەوڵەکانە بۆ چارەسەرکردنی کێشە و گرفتەکانی ناو یەکێتی، داواشی لە یەکێتییەکان کردووە، ھەموو کێشە و جیاوازییەکان بە ڕێگای لێکتێگەیشتن چارەسەر بکرێت.

ڕاگەیاندنی یەکێتی ھێمای بۆ ئەوە کردووە کە لەو کۆبوونەوەیەدا، ئەوە دووپاتکراوەتەوە کە یەکێتیی نیشتمانیی کوردستان، ھێزێکی کاریگەرە و دەبێت ھەمووان ھەوڵی گەشەپێدان و بەھێزکردنی ڕیزەکانی یەکێتی بدەن.

کۆبوونەوەکە بە ئامانجی چارەسەرکردنی ئەو کێشانەیە کە لە کۆتایی هەفتەی ڕابردووەوە لە ناو باڵە ناکۆکەکانی یەکێتی دروستبووە و لە ئەنجامی کۆبوونەوەکانیش، چەند پێشنیازێک بۆ چارەسەری کێشەکان، خراوەتە ڕوو.










باسنیوز