بەر لە دوو هەفتە ماڵپەڕی ( العربی الجدید ) هەوڵەکانی هێرۆ ئیبراهیم ئەحمەدی بۆ کۆسپ دروستکردن لە بەردەم هەناردە کردنی نەوتی کوردستان بڵاو کردەوە و لە راپۆرتێکی پر لە وردەکاری باسی لەو داوایەی هێرۆ ئیبراهیم ئەحمەد کردووە لە حکومەتی عێراقی بۆ وەستاندنی هەناردەکردنی نەوتی کەرکوک لە رێگای بۆریە نەوتیەکانی هەرێمی کوردستان بۆ بەندەری جەیهانی تورکیا، بەو هۆیەوە لە مانگی ئاداری رابردووەوە تا چەند رۆژێک بەر لە ئێستا هەناردەکردنی بڕە نەوتەکەی کەرکوک راگیرا بوو.
دوای سەردانیکردنی شاندی حکومەتی هەرێمی کوردستان بۆ بەغدا حکومەتی عێراقی ئاشکرای کرد کە ئەوان بەهۆی داواکاریەکی هێرۆ ئیبراهیم ئەحمەد ئەو بریارەیان داوە و ئەوەشیان راگەیاند کە هێرۆخان داوای کردووە نەوتی کەرکوک لە رێگای سلێمانیەوە بۆ ئێران رەوانە بکرێ بەلام بەهۆی فشاری ئەمەریکا و وڵاتانی ئەوروپی حکومەتی عێراق نەیتوانیوە ئەو داخوازیەی کۆنە خانمی یەکەمی عێراق بەجێبگەیێنن.
بەر لە چەند رۆژێکیش لە کاتی تەقینەوەی ناکۆکیەکانی نێوان باڵی دەستڕۆیشتووی یەکێتی و هەردوو جیگرەکانی سکرتێری گشتی یەکێتی نشتیمانی کوردستان، لە بەیاننامەی ناوەندی بڕیاردا کە زیاتر لە بیست ئەندامی مەکتەبی سیاسی و سەرکردایەتی یەکێتی ئیمزایان لەسەر کردووە دا هاتووە کە باڵی دەسترۆیشتوو بە سەرکردایەتی هێرۆ ئیبراهیم ئەحمەد هۆکاری بڕینی بودجە و وەستاندنی هەناردەکردنی نەوتی کوردستان و زیانگەیاندن بە داهات و بژێوی خەڵکە.
پێشترێش شێخ جەعفەر شێخ مستەفا ئەوەی ئاشكرا کردبوو کە عادل مورادی سەر بەباڵی هێرۆ و لەتیف رەشیدی میردی خوشکی هێرۆ پێشنیاری بڕینی بودجە و مووچەی کوردستانیان بۆ مالیکی کردووە، کە هەموو ئەو شتانە هۆکاری درووستبوونی ئەو قەیرانە داراییەن کە هەرێمی کوردستانی گرتۆتەوە و رەنگە بەو هۆیەشەوە حکومەت نەتوانێ مووچەی هەموو وەزارەتەکان بەر لە جەژن بدا.