پەرلەمانتارێكی پارتی دیموكراتی كوردستان له‌ ئه‌نجوومه‌نى نوێنه‌رانى عێراق دەڵێت، هەوڵی لادانی وەزیری دارایی لەلایەن لایەنگرانی (نووری مالیكی)ـیەوە پێشتر بەرنامەی بۆ داڕێژراوە، بۆ ئەوەی هیچ سەركردەیەكی پارتی دیموكراتی كوردستان لە بەغدا نەمێنێت، بەڵام ئێمە ١٠٠ئیمزامان كۆ كردووەتەوە بۆ ئەوەی رێگری لێ بكەین".

(حاكم سەرحان سلێڤانەیی)، رایگەیاند: "بڕیارە رۆژی دووشەممە بگەڕێینەوە بۆ بەغدا و لیستی دەوڵەتی یاساش دەیەوێت رۆژی سێشەممە وەرگرتنی متمانە لە وەزیری دارایی بخاتە بەرنامەی كارەوە، ئێمەش نزیكەی ١٠٠ئیمزامان كۆ كردووەتەوە بۆ ئەوەی رێگری لێ بكەین و زۆر هەوڵیشمان لەگەڵ لایەنەكان داوە، بۆیە گەر ئەو كارە بكرێت، هەڵوێستمان دەبێت".

(سلێڤانەیی) گوتیشی، ئەوەی كراوە بە هیچ شێوەیەك لەبەر گەندەڵی نییە و هۆكارەكەی سیاسییە و پێشتر بەرنامەی بۆ داڕێژراوە لەلایەن لیستی دەوڵەتی یاسا و كوتلەی نزیك لە (نووری مالیكی)ـیەوە نەك سەرۆكوەزیران، ئەمەیش ئامانج لێی پارتی دیموكراتی كوردستانە و هیچ لایەنێكی دیكە نییە.

ئه‌و پەرلەمانتاره‌ى پارتی ده‌شڵێت، لایەنگرانی (مالیكی) هەڵمەتێكیان دەست پێ كردووە و دەیانەوێت هیچ سەركردەیەكی پارتی دیموكراتی كوردستان لە بەغدا نەمێنێت و هەموویان لە دەستەڵات لاببەن، هەر بۆیەیش ئەو كارانە دەكەن، ئه‌گه‌رنا بۆ ئەو كەسانە دەستگیر ناكەن كە بە ملیاران دۆلاریان بردووە بۆ دەرەوەی عێراق و دزیویانە و كەس باسیان ناكات؟ ئێستایش پەرلەمانتار دێت بۆ پەرلەمان كە فەوجێك پاسەوانی هەیە، بۆ لەمانە ناپرسنەوە؟ بەڵام ئەمە مەرامی سیاسی لە پشتەوەیە و هیچی دیكە نییە.












KDP