مەولەوی جەبار سەرۆکی دەستەی گشتیی گەشتوگوزاری هەرێمی كوردستان رایگەیاند بەم زووانە گەشتی ئاسمانی لە نێوان وڵاتی کوێت و هەرێمی کوردستاندا رێک دەخرێت بۆ ئەوەی گەشتیاران بتوانن راستەوخۆ لە کوێتەوە بێن بۆ هەرێمی کوردستان.

بەمەبەستی پەرەپێدانی کەرتی گەشتیاری لە هەرێمی کوردستان، کۆمپانیان فلای میران بەچاودێریی دەستەی گەشتوگوزاری هەرێم، گرێبەستێکی لەگەڵ کۆمپانیای ئیکارۆس تۆری کوێتی ئیمزا کرد و بڕیارە لە ناوەڕاستی مانگی 10دا یەکەمین گەشتی ئاسمانی لە وڵاتی کوێتەوە بەرەو هەولێر ئەنجام بدرێت.


بەپێی گرێبەستەکە کۆمپانیای ئیکارۆس تۆڕی کوێتی لە ئێستاوە ھەڵمەتی بەبازاڕکردن بۆ گەشتوگوزار دەست پێدەکات و کەرتی گەشتیاریی ھەرێمی کوردستان بەھاووڵاتییانی کوێت دەناسێنێ.

سەرۆکی دەستەی گشتیی گەشتوگوزاری هەرێم مەولەوی جەبار لە رێورەسمی واژووکردنی گرێبەستەکەدا ئاماژەی بەوە کرد حکوومەتی ھەرێم بەردەوام دەبێت لە پەرەپێدانی کەرتی گەشتیاری و رێکخستنی گرێبەست لە نێوان کۆمپانیاکانی وڵاتانی بیانی و کۆمپانیاکانی ھەرێمی کوردستان، جەختی لەوەش کردەوە کۆمپانیای گەشتیاری کوێتی سەرسامی خۆی بە سرووشتی کوردستان و ئارامی و سەقامگیری ناوچەکە نیشان داوە.

مەولەوی جەبار باسی لەوە کرد ساڵانی حەفتا و ھەشتاکان کوردستان یەکێک بوو لەو شوێنانەی گەشتیارانی کوێت روویان تێدەکرد، بۆیە ئەوانەی ئێستە تەمەنیان زۆرە، بەشێکی زۆریان شارەزای ناوچە گەشتیارییەکانی هەرێمی کوردستانن.












باسنيوز