سەرۆکوەزیرانی کوردستان لە بەغدا سەردانی باڵیۆز و دیپلۆماتكارانی باڵیۆزخانەی ئەمەریكای کرد و، لە دیداری نێوانیاندا دووپات لە پێوەندییە دووقۆڵییەکانی نێوان هەرێمی کوردستان و ئەمەریکا کرایەوە.

لە چوارچێوەی سەردانەكەیدا بۆ بەغدا، ئێوارەی ئەمڕۆ دووشەممە ٢٩-٨-٢٠١٦ نێچیرڤان بارزانی سەرۆكوەزیرانی هەرێمی كوردستان و شاندی یاوەری سەردانی باڵیۆزخانەی ویلایەتە یەكگرتووەكانی ئەمەریكای كرد و لەلایەن ستیوارت جۆنز باڵیۆز و دیپلۆماتكارانی باڵیۆزخانەی ئەمەریكاوە پێشوازی لێ كرا.

لە دیدارێكدا باڵیۆزی ئەمەریكا لە عێراق كە كارەكانی وەك باڵیۆزی وڵاتەكەی لە بەغدا بەكۆتا هاتووە، خۆشحاڵیی خۆی بە دیداری لەگەڵ سەرۆكوەزیرانی هەرێمی كوردستان دەربڕی و سوپاسی پاڵپشتی و كارئاسانیی هەرێمی كوردستانی كرد بۆ كارەكانی لەو ماوەیەی كە وەك باڵیۆز لە عێراق كاری كردووە و پتەوكردنی زیاتری پەیوەندییەكانی نێوان هەرێمی كوردستان و ئەمەریكاشی دووپات كردەوە.

لای خۆیەوە سەرۆكوەزیرانی هەرێمی كوردستان سوپاسی باڵیۆزی ئەمەریكای كرد بۆ هەوڵە بەردەوامەكانی لە پتەوكردنی زیاتری پەیوەندییەكانی نێوان هەرێمی كوردستان و ویلایەتە یەكگرتووەكانی ئەمەریكا و هیوای سەركەوتنی بۆ خواست لە كار و ئەركی نوێیدا، هەروەها پوختەیەكی دەرباری ئەو گفتوگۆ و دیدارانە خستە ڕوو كە لە بەغدا لەنێوان شاندی هەرێمی كوردستان و بەرپرسانی حكوومەتی عێراقی فیدرال لە سەر بابەتە جیاوازەكان ئەنجامدراون و جەختی لەسەر ئەوە كردەوە كە لە هەموو بوارەكاندا حكوومەتی هەرێم ئامادەیە لەگەڵ بەغدا هاوكار بێت بۆئەوەی هەموو كێشەكان بەشێوەیەك چارەسەر بكرێن كە لە بەرژەوەندیی هەردوولادا بێت.

تاوتوێكردنی ڕەوشی ئەمنی و سیاسیی عێراق و هەرێمی كوردستان و دوا پێشهاتەكانی شەڕی دژی تیرۆرستانی داعش و چەند بابەتێكی دیكەی پەیوەندیدار، لایەنێكی دیكەی دیدارەكە بوو.


PDK.info