بە مەبەستی گفتوگۆکردن لەگەڵ بەرپرسانی عێراق، نێچیرڤان بارزانی، سەرۆک وەزیرانی هەرێمی کوردستان، سەردانی بەغدای پایتەختی عێراق دەکات.



سەفین دزەیی، گوتەبێژی فەرمیی حكوومەتی هەرێمی كوردستان، بە ماڵپەڕی فەرمیی حكوومەتی ڕاگەیاند، ئەمڕۆ دووشەممە 29\8\2016، نێچیرڤان بارزانی، سەرۆك وەزیرانی هەرێمی كوردستان و شاندێكی یاوەری، سەردانی بەغدا دەکەن و لەگەڵ بەرپرسانی حكوومەتی فیدراڵ کۆدەبنەوە.

دەربارەی ئەو كۆبوونەوە و دیدارانەی سەرۆکی حکوومەتی هەرێمی کوردستان لە بەغدا ئەنجامیان دەدات، دزەیی ئاشکرای کردووە: “نێچیرڤان بارزانی لەگەڵ هەریەك لە حەیدەر عەبادی، سەرۆك وەزیرانی عێراق و بەرپرسانی دیكەی حكوومەتی فیدرال كۆبوونەوە و دیدار ئەنجام دەدات”.



گوتەبێژی فەرمیی حکوومەتی هەرێمی کوردستان ڕوونیشی کردووەتەوە، سەردانەكە ئاسایی یە و بابەتی گفتوگۆكان، بواری ئەمنی و پرۆسەی ئازادكرنەوەی شاری مووسڵ و پەیوەندییەكانی داهاتووی نێوان هەولێر و بەغدا و چەند بابەتێكی دیكەی پەیوەندیدار دەبن.



پێشتر وەزیری نەوتی عێراق ڕای گەیاندبوو کە دەکرێت هەولێر و بەغدا سەبارەت بە هەناردەکردنی نەوت ڕێک بکەون، دواتریش جێگرەکەی ئاماژەی بەوە کردبوو کە ئەگەر هەولێر و بەغدا لەسەر هەناردەکردنی نەوت ڕێک نەکەون، ئەوا بەغدا پەنا بۆ ڕێگا چارەی دیکە دەبات کە یەکێک لەوانە، ئەگەری هەناردەکردنی نەوتە لە ڕێگای ئێرانەوە.







باسنیوز