بەڕێوەبەری كۆنترۆڵی كارەبای هەرێمی كوردستان رایگەیاند، بەهۆی پچڕانی ژمارەیەك هێڵی كارەبا، كارەبای سەرەكی هەموو هەرێمی كوردستان بڕاوە، ئێستاش لە هەوڵی چارەسەركردنی كێشەكە دان.

ئومێد محەممەد، بەڕێوەبەری كۆنترۆڵی كارەبا راگەیاند "بەهۆی پچڕانی ژمارەیەك هێڵی كارەبا لەنێوان كۆمەڵێك تاوەری 132 كەیڤی، كارەبای شارەكانی هەولێر و سلێمانی و دهۆك بڕاوە. هێڵەكان لەنێوان هەولێر - سلێمانی، سلێمانی - دووكان پچڕاون، بەو هۆیەوە كارەبا بڕاوە."

ناوبراو هەروەها گوتی "وەك ڤۆڵتە كێشەكە چارەسەركراوە، تەنیا وەك بەرهەم كێشەكە ماوە، تاوەكو 2 بۆ 3 كاژێری داهاتوو ئەوەش چارەسەر دەكرێت. كارەبای دهۆك چاككراوەتەوە و بەشێكی هەولێر و سلێمانی كێشەی ماوە، لە هەوڵی چارەسەركردنی ئەوەش داین.

چوار هێڵی پاڵەپەستۆی بەرزی 132 کەیڤی، ھێڵێکی دووکان- تاسڵوجە، تاسڵوجە و بازیان - رۆژھەڵاتی ھەولێر پچڕاون.