لە ماوەی رابردوودا ژمارەیەک لە رێکخراوە نێودەوڵەتییەکان بەردەوام تۆمەتی ئەوە دەخەنە پاڵ هێزەکانی پێشمەرگە کە رێگا نادەن خەڵکی ناوچە ئازادکراوەکان بگەڕێنەوە سەر ماڵ و حاڵی خۆیان، یاخود بە زۆر لە شوێنەکانی خۆیانیان دوور دەخەنەوە لە کاتێکدا کە خەڵکی ئەم ناوچانە ئارەزووی مانەوەیان هەیە لەسەر زێدی خۆیان هەیە.

د. دیندار زێباری، سەرۆکی لیژنەی هەڵسەنگاندن و وەڵامدانەوەی راپۆرتە نێودەوڵەتییەکان لە ئەنجومەنی وەزیران ئاماژەی بەوە کرد کە هێزەکانی پێشمەرگە و هێزە ئەمنییەکانی حکومەتی هەرێمی کوردستان نەک رێگر نەبوونە لەبەردەم گەڕانەوەی خەڵک بۆسەر ماڵ و حاڵی خۆیان بەڵکو بەردەوام هاوکاری هاووڵاتیانی عەرەبیان کردووە لە گەڕانەوە بۆسەر ماڵ و حاڵی خۆیان و ئاوەدان کردنەوە و پاراستنی گوندەکانیان بەجۆرێک کە پاش رزگارکردنی ناوچەی جەلەولا لەژێر دەستی داعش تا ئێستا زیاتر لە نیوەی ئەم ناوچەیە ئاوەدان کراوەتەوە و لە رۆژی (١٣/١/٢٠١٦)ـــەوە تا ئێستا بەپێی بەرنامە لە کۆى هەشت گەڕەک چوار گەڕەک ئاوەدانکراوەتەوە ئەوانیش گەڕەکەکانی (الطلیعە، العروبە، الشهداء، الجماهیر)ن لەم گەڕەکانە نزیکەى (4900) خێزان گەڕاونەتەوە ئەمەش بە ژمارەیەکی پێوانەیی دادەنرێت و دوای گەڕانەوەش ئاو و کارەبا و پێداویستییە سەرەتاییەکانیان بۆ دابینکراوە.

سەرۆکی لیژنەی هەڵسەنگاندن و وەڵامدانەوەی راپۆرتە نێودەوڵەتییەکان جەخت لەسەر ئەوە دەکاتەوە کە "دامودەزگا حکومییەکان هۆکار نین بۆ نەگەڕانەوەی خەڵک بۆسەر ماڵ و حاڵی خۆیان بەڵکو بە گوێرەی توانا هاوکاری تەواویشیان دەکەن، بەڵام زۆری مین و بۆمبە دانراوەکان هۆکارێکن بۆ نەگەڕانەوەی بەشێک لە هاووڵاتیان، چونکە بەشێکی ئەم مین و تەقەمەنیانە بە جۆرێک دانراون کە زۆر جار ئەو کارەبایەی لە ئەنجامی هەورە بروسکەشەوە درووست دەبێت دەبێتە هۆى تەقینەوەیان و مەترسی لەسەر ژیانی هاووڵاتیان درووست دەکات".

سەبارەت بە پرسی گەڕانەوەی خەڵکی ناوچەکە بۆ سەر زێدی خۆیان سەرۆکی لیژنەی هەڵسەنگاندن و وەڵامدانەوەی راپۆرتەنێودەوڵەتییەکان دەڵێت کە پێویستە ئاماژە بە بارودۆخی ناوچەکانی دەوروبەری جەلەولا بکرێت، چونکە جگە لە جەلەولا چەند ناوچەیەکی دیکەش هەن کە پێش جەلەولا رزگارکراون لەوانە ناحیەکانى (عظيم، سەعدیە، میقدادیە) و راستەوخۆ دوای رزگارکردنیان لەلایەن پێشمەرگەوە خەڵکەکەی گەڕاونەتەوە سەر ماڵ و حاڵی خۆیان.

لە کۆتاییدا د. دیندار زێباری گوتی: "حکومەتى هەرێم زیاتر لە تواناى خۆى باوەشى بۆ عەرەبە ڕاگوێزراوەکانى ناوچەکە کردۆتەوە و هیچ کەمتەرخەمییەکی نەکردووە، تەنانەت خەڵکی ناوچەکە ئاماژە بەوە دەکەن کە پێشمەرگە هاوکاری سەرەکیان بووە و لەبەرەمبەردا حکومەتى ئیتیحادی هەڵوێستی نەرێنی بووە و گرفت و تەگەرەى بۆحکومەتى هەرێم دروستکردووە، بەجۆرێک تەنانەت ئەو هاریکارییەی بۆ راگوێزراوانیش دێت ناهێڵن بگاتە دەستیان".










باسنيوز