نامیلكەیەك لە مزگەوتەكاندا بڵاودەكرێتەوە بە پێشمەرگە دەڵێت "مورتەد"
ئەم نامیلكەیە بەناوی "راستكردنەوەی 100 وشە و زاراوەی بەتاڵ" لە 80 لاپەڕە پێكدێت و لەلایەن كەسێك بە نێوی هێمن ئەبوزەید دانراوە. ژمارەی سپاردن (392)ی پێدراوە و گوایە ساڵی ( 1420ی كۆچی) یەكەم چاپی كراوە، بەڵام بەهۆی ئەوەی چاپكردنی لە چاپخانەكان قەدەغەكراوە، بەشێوەی فۆتۆكۆپی وێنەی لەبەردەگیرێتەوەو دابەش دەكرێ.
سەركەوت، گەنجێكی تەمەن 20 ساڵە و ماوەیەك لەمەوبەر كەسێك ئەو نامیلكەیەی پێداوە، گوتی "گەنجێكی برادەرم لەشاری هەولێر ئەم نامیلكەیەی دامێ بیخوێنمەوە، بەڵام من نەمخوێندەوە". گوتیشی "نازانم ئەو برادەرەم نامیلكەكەی چۆن دەستكەوتووە".
لە لاپەڕە 14ی نامیلكەكەدا باسی پێشمەرگە كراوە و دەڵێت "ئەم وشەیە زاراوەی مورتەدەكانە و ئەوان دایانڕشتووە. پاشان كەس پێش مەرگ نەكەوتووە و ناكەوێ نە مەلائیكەت نە پێغەمبەران پێشمەرگ نەكوتوون و ناكەون...وشەی پێشمەرگە پێچەوانەی قورئان و فەرموودەی پێغەمبەرە". هەروەها نووسیویەتی "بۆ موسوڵمان موجاهید بەكاردێت، بۆ غەیری موسڵمانیش سەربازی شەیتان".
نامیلكەكە چەند دەستەواژەیەكی دیكەش بە زاراوە و وشەی هەڵە ناو دەبات وەكو "نەورۆز، بەیانی باش، ئێوارە باش، خدری زیندە، شەهید، برایانی مەسیحی". لەبارەی بەیانی باش و ئێوارە باش دەڵێت "ئەم جۆرە قسانە بێگومان لادانە لە سەلامی ئەهلی بەهەشت. بەڵام بەكارهێنانی وشەی (مرحبا) دروستە".
مەریوان نەقشبەندی، بەڕێوەبەری پەیوەندییەكان و پێكەوەژیانی ئاینی لە وەزارەتی ئەوقاف و كاروباری ئاینی بە (رووداو)ی گوت "هەستمان بەوە كردووە كۆمەڵێك دەزگای بێ مۆڵەت لە هەرێمی كوردستان هەن، شوێنیان هەیە و هەندێكیان لەنێو ماڵەكان كاردەكەن، دەستمان بە داخستن و راوەدوونانیان كردووە. لەگەڵ وەزارەتەكانی رۆشنیری، ناوخۆ و لایەنی پەیوەندیدار لە پەیوەندیداین بۆ گرتنەبەری رێوشوێنی پێویست."
نەقشبەندی ئەو جۆرە بڵاوكراوانەی بە بەشێك لە تیرۆری فیكری نێوبرد و گوتی "هەر كەسێك ئەو جۆرە نامیلكانە بڵاوبكاتەوە دەستگیر دەكرێت و رووبەڕووی لێپرسینەوەی یاسایی دەبێتەوە".
نامیلەكەكە نەورۆز بە "جەژنی مەجوسییەكان" دەزانێت. رەخنەش لەوانە دەگرێت كە دەستەواژەی "برا مەسیحییەكان" بۆ كریستیانەكانی هەرێمی كوردستان بەكاردێنن. نووسەرەكەی دەڵێت "ئەمەش روویەكی تر لە گۆماوی لێڵی فیقهی واقع كە بە پاچ و خاكەناز بەرئەبنە بنیاتی پتەوی عەقیدە بەناوی فیقهی واقیعەوە".
بێجگە لەو نامیلكەیە، نامیلەكەیەكی دیكەش بەنێوی "حوكمی: گۆرانی، وێنەگرتن، ریش تاشین، درێژكردنەوەی جل و بەرگ بۆ پیاوان، جگەرە كێشان" بڵاوكراوەتەوە كە 24 لاپەڕەیە. ئەو نامیلەكەیە لەلایەن شێخ عەبدولعەزیز بن باز، شێخ محەممەد ساڵح ئەلعسێمین دانراوە. كەسێكیش بەنێوی ئیلیاس محەممەد ئەلكوردی وەریگێڕاوەتە سەر زمانی كوردی.
ئەم نامیلكەیە "گۆرانی، وێنەگرتن، ریش تاشین، درێژكردنەوەی جل و بەرگ بۆ پیاوان، جگەرەكێشان" بەتوندی رەتدەكاتەوە. ئامۆژگاری بۆ كچان و كوڕان بڵاوكردووەتەوە و هۆشداریش دەداتە گەنجان كە كۆچ بۆ وڵاتانی ئەوروپی نەكەن "چونكە مەترسی دەخاتە سەر بیروباوەڕ و خوڕەوشتیان".
مەریوان نەقشبەندی باسی سەرچاوەی هەندێك لەو جۆرە نامیلكانە دەكات و دەڵێت "لەسەر پێشنیازی وەزارەتەكەمان، وەزارەتی ناوخۆی هەرێمی كوردستان چەند دەزگایەكی ئیسلامییان داخستووە. ئەو دەزگایانە لەگەڵ ئەوەی هیچ مۆڵەتێكی كاركردنیان نەبووە، بەڵام رادیۆ و بڵاوكراوەی تایبەت بەخۆیان هەبووە و بیری توندڕەوییان بڵاودەكردەوە".
رووداو
