كۆبوونه‌وه‌ی سه‌ركردایه‌تی هاوبه‌شی یه‌كێتی و گۆڕان له‌گه‌ڵ فراكسیۆنه‌كانییان له‌پارێزگاكانی هه‌رێمی كوردستان كۆتاییهات و له‌كۆبوونه‌وه‌كه‌دا بڕیاردرا فراكسیۆنێكی هاوبه‌ش له‌نێوان یه‌كێتی و گۆڕان له‌سه‌ر ئاستی پارێزگاكانی هه‌رێمی كوردستان دروستبكرێت.

له‌كۆبوونه‌وه‌كه‌ی ئه‌مڕۆی سه‌ركردایه‌تی هاوبه‌شی یه‌كێتی و گۆڕان له‌گه‌ڵ فراكسیۆنه‌كانییان له‌پارێزگاكانی هه‌رێمی كوردستان بڕیاردرا له‌پێناو یه‌ك هه‌ڵوێستی هه‌ر دوو فراكسیۆن له‌سه‌ر پرسه‌ نیشتمانییه‌كان و پرسه‌ ناوخۆییه‌كان، فراكسیۆنێكی هاوبه‌ش له‌ماوه‌یه‌كی نزیكدا دروستبكرێت.

هه‌ر له‌كۆبوونه‌وه‌كه‌دا بڕیاردرا هه‌ر كارێك له‌ به‌رژه‌وه‌ندی هاووڵاتیاندا بێت له‌ رێگه‌ی ئه‌و فراكسیۆنه‌ هاوبه‌شه‌وه‌ بكرێته‌ پرۆژه‌و پێشكه‌ش به‌ سه‌رۆكایه‌تی ئه‌نجومه‌نی پارێزگاكانی هه‌ولێر و دهۆك و سلێمانی بكرێت تا سه‌رۆكایه‌تی ئه‌نجومه‌نه‌كانی پارێزگاكان بڕیاری له‌سه‌ر بده‌ن و كاری له‌سه‌ر بكرێت.

له‌دوای كۆبوونه‌وه‌كه‌ش هه‌ردوولا كۆنگره‌یه‌كی رۆژنامه‌وانییان ئه‌نجامداو تێیدا ناوه‌ڕۆكی كۆبوونه‌وه‌كه‌یان خسته‌ڕوو، هه‌روه‌ها ته‌ئكیدیان له‌سه‌ر دروستكردنی فراكسیۆنێكی هاوبه‌ش كرده‌وه‌.












باسنيوز