پاش نیوەڕۆى ئەمڕۆ هەینى، دەزگاى خێرخوازیى بارزانى بەهاوکارى خوێندکارانى زانکۆى ئەمریکیى دهۆک، کۆمەک و هاوکارى بەسەر چوار هەزار ماڵە هەژارى سلێمانى دابەش کرد.

ئیسماعیل عەبدولعەزیز بەرپرسی هاوکارییەکانى دەزگاى خێرخوازیى بارزانى، لە لێدوانێکیدا گوتی "دەزگاى خێرخوازیى بارزانى بە مەبەستى کۆمەک و هاوکاری کەسانى هەژار و خاوەن پێداویستى تایبەت لە سەرەتای مانگى ڕەمەزانەوە، تەواوى تیمەکانى خۆى لە هەرێمى کوردستان بڵاوە پێکردووە، بۆ ئەوەى زیاتر هاوکارى کەسانى هەژار بکەین".

گوتیشى "هاوکارییەکانمان تەواوى قەزا و ناحیەکانى هەرێمى کوردستان دەگرێتەوە، بێگومان ئەمڕۆ بەهاوکارى زانکۆى ئەمریکى دهۆک، توانیمان لە شارى سلێمانى بەبێ جیاوازى کۆمەکى چوار هەزار خێزانى ماڵە هەژار و خاوەن پێداویستى تایبەت بکەین".