بەبێ پارتی پەرلەمان کارا ناکرێتەوە
د.جەعفەر ئیمنکی جێگری سەرۆکی پەرلەمانی کوردستان راگەیاند: بەو لێژنەی فراکسیۆنی گۆڕان و یەکێتی دروستیان کردووە پەرلەمان کارا نابێتەوە، چونکە خۆیان باش لەوە دەزانن کە پەککەوتنی پەرلەمان بەهۆکارێکی سیاسی بووە کە خۆیان بەشێک بوون لەوە و تەوافوقی پەرلەمانیان تێکشاند.
گوتیشی: "ئەگەر ئەوان دەیانەوێت پەرلەمان کارابکرێتەوە دەبێت تەوافوقێکی نوێ بکرێت کە کاراکردنەکە دەبێت لەپرۆسەی سیاسی دەست پێبکاتەوە و دەبێت تەوافوقێکی نوێی سیاسی بکرێت، چونکە ناکرێت لەسەر پارتی بازی کاراکردنەوەی پەرلەمان بدرێت و بەبێ پارتی پەرلەمان کاراناکرێتەوە".
ئاماژەیشی دا: "ئەو تەوافوقەی بۆ پێکهێنانی پەرلەمانی کوردستان کراوە لەنێوان لایەنەکان هەڵوەشاوەتەوە، بۆیە بۆ ئەوەی پەرلەمان کارابکرێتەوە دەبێت دووبارە دانیشتن و گفتووگۆ بكەین، بۆ ئەوەی بگەیەنە دەرئەنجامێک یان بڕیارێکی نوێ".
ئەوەشی خستەروو: بەبێ پارتی پرۆسەی سیاسی لە کوردستان بەڕێوە ناچێت چونکە بە پێی هەڵبژاردن و هەموو پێوەرە دیموکراتییەکان پارتی دیمورکراتی کوردستان گەورەترین هێزی سیاسییە.
