ئەندامێكی سەركردایەتیی حزبی سۆسیال‌دیموكراتی كوردستان ڕایگەیاند، هەرێمی كوردستان بووەتە پەناگەیەك بۆ بەشەكانی دیكە، چونكە هەر كاتێك ئەوان تووشی كێشەیەك ببن حكوومەتی هەرێم بە دەم بانگەوازی ئەوانەوە دەچێت، بۆیە كردنەوەی دەروازەی سێماڵكا هەنگاوێكی گرنگە و سەركەوتنێكی دیكەیە بۆ حكوومەتی هەرێم، بۆ ئەمەیش پێویستە پەیەدە پابەندی ڕێنماییەكان بێت و ئەویش لەگەڵ حكوومەتی هەرێمی كوردستان هاوكار بێت، تا گەلی ئێمە لەو بەشەی كوردستان بە ئازادی بژیێت.

(مسلیح ڕەجەب) ئەندامی سەركردایەتیی حزبی سوسیال‌دیموكراتی كوردستان وای بە ماڵپەڕی فەرمیی پارتی دیموكراتی كوردستان گوت: "هەر بەشێكی كوردستان تووشی كێشەیەك ببێتەوە، هەرێمی كوردستان دەبێتە پەناگەیەك بۆی و هاوكاریی ئەو بەشە دەكات، ئەو بڕیارەی سەرۆكایەتیی هەرێم و حكوومەتی هەرێم بۆ كردنەوەی دەروازەی سێماڵكا زۆر پێویست بوو و ئەوە سەركەوتنێكی گەورەیە، چونكە گەلی ئێمە لە ڕۆژئاوا زۆر پێویستیان بە كردنەوەی ئەو دەروازەیە هەبوو، بۆیە ئەو بڕیارەی حكوومەت بۆ تێپەڕبوونی خۆراك و دەرمان هەنگاوێكی زۆر گرنگە."

گوتیشی: "پێویستە پەیەدە پابەندی ڕێنماییەكان بێت و ئەویش لەگەڵ حكوومەتی هەرێمی كوردستاندا هاوكار بێت، تا گەلی ئێمە لەو بەشەی كوردستان بە ئازادی بژیێت و، نرخی كەلوپەل لەو بەشەی كوردستان هەرزان بێت تا فەقیر و هەژاران بژین."











KDP