لەدرێژەی سەردانەكەیدا بۆ وڵاتی كەنەدا شاندی هەرێمی كوردستان كە پێكهاتبوو لە زەیا بۆترۆس سەرۆكی دەستەی سەربەخۆی مافی مرۆڤ و دیندار زێباری جێگری بەرپرسی فەمانگەی پەیوەندییەكانی دەرەوە بۆ كاروباری رێكخراوەكانی نێودەوڵەتی سەرۆكی لێژنەی باڵای بەدواداچوونی ڕاپۆرتەكانی نێودەوڵەتی بەجیا لەلایەن هۆنۆرابل تیم ئۆباڵ وەزیری دەوڵەتی كەنەدا بۆ كاروباری رۆشەنبیری جیاواز و بەرێوەبەری سیاسات لە نووسینگەی وەزیری دەرەوەی ئەم وڵاتە پێشوازلێكرا.



لەدیدارێكدا باس لە رەوشی مافی مرۆڤ لە هەرێمی كوردستان و هەنگاوەكانی حكومەتی هەرێمی كوردستان لەم بوارە كرا.

لەلایەن خۆیەوە دیندار زێباری باس لە پرۆسەی سیاسی و دیموكراسی لە هەرێم كرد و ئاماژە بە پرۆسەی هەڵبژاردن و رۆڵی پەرلەمانی كوردستان و كێشەكانی نێوان هەولێر و بەغدا دا.

هەروەها سەرۆكی دەستەی سەربەخۆی مافی مرۆڤ لە هەرێمی كوردستان راگەیاند" دەستەكە كار دەكات بۆ پاراستنی رۆشەنبیری جیاواز و بڵاوكردنەوەی لە هەرێمی كوردستان لەرێگای سازكردنی خولی تایبەت و ۆورك شۆپەكانەوە، هەروەها ئاماژەی بەوەشدا كە گەلی كوردستان لە قوناغەكانی مێژووی خۆی دا هەمیشە پارێزەری گیانی لێبوردەی و پێكەوە ژیان بووە و رێز لە رۆشەنبیری جیاوازی یەكتری گرتووە.

لەبەرامبەریدا وەزیری دەوڵەتی كەنەدا بۆ كاروباری رۆشەنبیری جیاواز خۆشحاڵی خۆی بە رەوشی مافی مرۆڤ و پرۆسەی پێكەوە ژیانی ئاشتیانەی نێوان پێكهاتەكانی گەلی كوردستان و هەنگاوەكانی حكومەتی هەرێم لەم بوارەوە دەربری و پشتگیری خۆشی بۆ سەرخستن و زیاتر گەشەكردنی بواری مافی مرۆڤ و رۆشەنبیری جیاواز لە هەرێمی كوردستان دووپاتیكردەوە.