سه‌رۆكی‌ هه‌رێمی‌ كوردستان، ساڵیادی‌ دامه‌زراندی‌ یه‌كێـی‌ مامۆستایانی‌ كوردستان پیرۆزده‌كات، راشیده‌گه‌یه‌نێـت، كه‌ بەدرێژایی مێژووی خەباتی رزگاریخوازی کوردستان، مامۆستایان سەرباری ئەرکی پێگەیاندنی نەوەکانی گەلەکەمان، وەک پێشمەرگەی ئازا و تێکۆشەر له‌ رێزی پێشه‌وه‌ی خه‌باتدا بوون، مه‌سعود بارزانی‌، سه‌رۆكی‌ هه‌رێمی‌ كوردستان، له‌ په‌یامێكدا پیرۆزبایی خۆی‌ ئاڕاسته‌ی‌ یه‌كێتی‌ مامۆتایانی‌ كوردستان ده‌كات، ده‌شڵێت: "یه‌كێتیی مامۆستایانی كوردستان مێژوویەکی پڕ لە شانازیی هەیە و ڕۆڵی درەوشاوەی له‌ بزوتنه‌وه‌ی رزگاریخوازی گه‌لی كوردستاندا هەرگیز لەیاد ناکرێت. به‌ پێویستیشی ده‌زانێت، مامۆستایان بە هەمان رۆحییەتی پێشمەرگانەوە لە خەباتدا بن و هەستی نیشتیمانپەروەری و کوردایەتیی لەناو نەوەی ئێستادا پەرە پێ بدەن.

ده‌قی په‌یامه‌كه‌:

به‌ ناوی خوای مه‌زن و دلۆڤان

به‌رێزان سكرتێر و ئه‌ندامانی سكرتاریه‌تی یه‌كێتیی مامۆستایانی كوردستان

سڵاو و رێز

به‌بۆنه‌ی یادی پەنجاودوو ساڵەی دامه‌زراندنی یه‌كێتیی مامۆستایانی كوردستان، پیرۆزباییه‌كی گه‌رم ئاراسته‌ی ئێوه‌ و سه‌رجه‌م مامۆستایانی خۆشەویستی كوردستان ده‌كه‌م و هیوای سەرکەوتنی زیاترتان بۆ دەخوازم .

یه‌كێتیی مامۆستایانی كوردستان مێژوویەکی پڕ لە شانازیی هەیە و ڕۆڵی درەوشاوەی له‌ بزوتنه‌وه‌ی رزگاریخوازی گه‌لی كوردستاندا هەرگیز لەیاد ناکرێت. بەدرێژایی مێژووی خەباتی ڕزگاریخوازی کوردستان، مامۆستایان سەرباری ئەرکی پێگەیاندنی نەوەکانی گەلەکەمان، وەک پێشمەرگەی ئازا و تێکۆشەر له‌ رێزی پێشه‌وه‌ی خه‌باتدا بوون و له‌و پێناوەشدا ده‌یان شه‌هیدی نه‌مریان پێشکەشی كوردستان کردووە.

ئێستاش کە گەلەکەمان هەنگاوی مەزنی لەپێشە، پێویستە مامۆستایان بە هەمان ڕۆحییەتی پێشمەرگانەوە لە خەباتدا بن و هەستی نیشتیمانپەروەری و کوردایەتیی لەناو نەوەی ئێستادا پەرە پێ بدەن و ڕێگە نەدەن هەوڵی ناحەزان بۆ بڵاوکردنەوەی هەستی خۆ بەکەمزانین و بێ ئیرادەیی لەناو منداڵ و گەنجانی وڵاتەکەماندا سەربگرێت.

پێویستە مامۆستایان ئەو وانەیە بە ڕۆڵەکانمان بڵێنەوە کە قوربانییەکانی گەلەکەیان لەیاد نەکەن و بە ئومێدێکی زۆرەوە بەرەو داهاتوویەکی پڕشنگدار هەنگاو بنێن.

هەر شاد و سەرکەوتوو بن.



مسعود بارزانی

سه‌رۆكی هه‌رێمی كوردستان

15/5/2014