ئه‌مڕۆ یه‌كشه‌ممه‌ 6ـی 4ـی 2014 له‌ په‌یوه‌ندییه‌كی ته‌له‌فۆنیدا سه‌رۆك بارزانی و سه‌ماحه‌تی سه‌ید موقته‌دا سه‌در بارودۆخی سیاسی و دوایین پێشهاته‌ سیاسییه‌كانی عێراقیان تاوتوێ كرد. هه‌روه‌ها قسه‌یان له‌سه‌ر بارودۆخی ناله‌باری ئه‌منی كرد كه‌ زۆر ناوچه‌ی عێراقی گرتووه‌ته‌وه‌ و هه‌ردوولا هیوایان خواست عێراق له‌م قه‌یرانه‌دا به‌ زووترین كات ڕزگار ببێت.

هه‌ر له‌م په‌یوه‌ندییه‌دا هه‌ردوولا جه‌ختیان له‌وه‌ كرده‌وه‌ كه‌ پێویسته‌ هه‌ڵبژاردنی ئه‌نجوومه‌نی نوێنه‌رانی عێراق له‌ كه‌شوهه‌وایه‌كی ئارام و له‌ كات و واده‌ی دیاریكراوی خۆیدا به‌ڕێوه‌ بچێت. هیواشیان خواست گه‌لانی عێراق به‌ جۆش و خرۆشه‌وه‌ به‌شداری هه‌ڵبژاردن ببن بۆ ئه‌وه‌ی ئه‌و گۆڕانكارییه‌ ڕوو بدات كه‌ گشت لایه‌ك داوای ده‌كه‌ن.