وەزارەتی پەروەردەی حکومەتی هەرێمی کوردستان رایدەگەیەنێت چەند داواکاریەک بۆ کردنەوەی پەیمانگایەکی زانستی نەوت ئاراستەی کراوە، واش بڕیارە لەساڵی داهاتوو ئەو پەیمانگایە بکرێتەوە.



بەڕێوەبەڕی گشتی پەیمانگاکان و مەشق لە وەزارەتی پەروەردەی حکومەتی هەرێمی کوردستان برایم بایز لە لێدوانێکی تایبەت بۆ ئاژانسی هه‌واڵ و رادیۆی پەیامنێر گووتی:"چەند داواکاریەک هاتووە بۆ کردنەوەی پەیمانگایەکی زانستی نەوت ئێمەش لای خۆمانەوە ئەوەی پێویست بووە بۆمان کردوە."



راشیگه‌یاند:"لێکۆڵینەوەمان لەشێوازی داواکارییەکان و ئەو بەرنامانە کردوە کەوا بۆ پەیمانگاکە دانراوە هاوکات کارمان لەسەر سیستەمی خوێندنی پەیمانگاکەش کردوە."



ئاماژەی بۆئەوەشکرد:"ساڵی داهاتوو ئەو پەیمانگایە لەهەرێمی کوردستان دەکرێتەوەو قوتابیان دەتوانن تێیدا بخوێنن."



تاکو ئێستا چۆنیەتی وەرگرتنی قوتابیان لەو پەیمانگایە ئاشکرا نەکراوە، چاوەڕێ دەکرێت دوای کردنەوەی هەندێک مەرج و ڕێنمایی بۆ وەرگرتنی قوتابیان لەپەیمانگاکە دابنرێت.