پاش ئەوەی لەچەند رۆژی رابردوودا چەكدارەكانی داعش و هێزە ئەمنییەكان لە سنووری ناحیەی قەرەتەپەو گوندەكانی رووبەرووی یەكتر بوونەوە، بە وتەی سەرچاوەیەك لە گوندێكی سنوورەكە هەشت كەس لە لایەن هێزێكەوە بێ سەرو شوێن كراون و تاوەكو ئێستا چارەنوسیان نادیارە.



سەرچاوەیەكی ئەمنی لە ناحیەی قەرەتەپە بە ئاژانسی هەواڵی پەیامنێری راگەیاند؛ دوای رۆژی 21ی نەورۆز چەكدارانی داعش لە سنووری ناحیەی قەرەتەپە دوو پردیان تەقاندەوە و لە چەند گوندێكی سنوورەكە رووبەروی یەكتربوونەوە، دواتر لە لایەن هێزێكی ئەمنییەوە لە گوندی لهێبی ناوچەكە هەشت كەس دەستگیركراون و تاوەكو ئێستا چارەنوسیان نادیارە.

ئەو سەرچاوەیە ئاماژەشیدا، كەسوكاری دەستگیركراوەكان رایانگەیاندووە، لە كاتێكدا بەدواچوونیان كردووە، پۆلیس دەڵێت دەستگیركراوەكان لای سوپایە و سوپاش دەڵێت لای هێزی سواتەو هیچ لایەكیان ئامادەنین بەرپرسیارێتی ئەو هەشت كەسە لە ئەستۆ بگرن و تاوەكو ئێستاش چارەنوسیان نادیارە.



گوتیشی، ماوەیەك لەمەوبەریش چەند كەسێك لە سنوورەكە دەستگیركران و دواتر كوژران، بۆیە ئێستا كەسوكاری ئەو هەشت كەسە ترسیان لەوە هەیە دەستگیراوەكانیان بكوژرێن كە لە ناویاندا دوو باوك و دوو كوڕی تێدایە.

رۆژی 21 نەورۆز لە سنووری ناحیەی قەرەتەپە، چەكدارانی داعش هیرَشیان كردە سەر چەند گوندێكی ناوچەكە توانییان كۆنترۆڵی بكەن و هەروەها دووپردی ناوچەكەیان تەقاندەوە و دواتر هێزە ئەمنییەكان رووبەروی ئەو چەكدارانە بوونەوە و توانییان ناوچەكە كۆنترۆڵ بكەنەوە.








PNA