سەرۆكی هەرێمی كوردستان پێشوازی لە خانەوادەی شەهید كاوە گەرمیانی دەكات
لەم دیدارەدا خانەوادەی ڕۆژنامەنووسی شەهید كاوە گەرمیانی سوپاسی سەرۆك بارزانیان كرد بۆ بەدواداچوون و خەمخۆریی بەڕێزیان بۆ كەیسی تیرۆركردنی شەهید كاوە گەرمیانی و وێڕای باسكردنی وردەكارییەكانی بەڕێوەچوونی دادگاییكردنی تۆمەتبارانی تیرۆركردنی شەهید كاوە گەرمیانی داواشیان لە سەرۆك بارزانی كرد كە بەهەموو توانایەكییەوە پاڵپشت بێت بۆ دۆزینەوەی تاوانباران و سزادانی ئەو كەسانەی لەپشتەوەی ئەنجامدانی ئەم تاوانەن.
لەبەرانبەردا سەرۆك بارزانی بە گەرمی بەخێرهاتنی كردن و هاوخەمیی خۆی بە كەسوكاری شەهید كاوە گەرمیانی ڕاگەیاند و ئاماژەشی بەوەدا كاوە گەرمیانی كەسێكی بێتاوان و پاك و بێگەرد و ڕۆڵەی خانەوادەیەكی نیشتیمانپەروەر و قوربانیدەر بووە و تیرۆركردنی تاوانێكی مەزن و دڕندانەیە. سەرۆك بارزانی هیوای ئەوەی خواست كە پڕۆسەی دادگاییكردنی تۆمەتباران ئەنجامی لێ بكەوێتەوە و تاوانباران ئاشكرا بكرێن بۆ ئەوەی بەشێك لە زامەكانی كەسوكاری شەهید سارێژ ببن. سەرۆك بارزانی داواشی لە خانەوادەی كاوە گەرمیانی كرد كە نائومێد نەبن و لەوە دڵنیای كردنەوە كە تاوانباران بە سزای خۆیان دەگەن و خوێنی كاوە گەرمیانی ون نابێت و پاڵپشتیی تەواوی خۆیشی بۆ داواكارییەكانی خانەوادە و كەسوكاری شەهید كاوە گەرمیانی دووپات كردەوە.
