بە پێی دواین زانیاری، لەشەڕەكەی ناحیەی سلێمان بەگ كە لە بەیانی ئەمرۆوە دەستی پێكردووە، ژمارەیەك بریندار هەیە كە سێ كەسیان پۆلیسن و بە گوللە هاوەن برینداربوون و هاوڵاتیانی ناوچەكەش بە بەردەوامی هەوڵی هەڵهاتن دەدەن.



بەرپرسی بازنەی حەمرینی یەكێتی نیشتمانی كوردستان مەلا كەریم بە ئاژانسی هەواڵی پەیامنێری راگەیاند؛ بە پێی دواین زانیاری لە شەرەكەی نێوان گروپە چەكدارەكان و هێزە ئەمنییەكان لە ناحیەی سلێمان بەگ، ژمارەیەك بریندار لێ‌ كەوتۆتەوە كە سێ كەسیان پۆلیسن و بە گوللە هاوەن برینداربوون و گەیەنراونەتە نەخۆشخانەی دووزخورماتوو.



وتیشی، هاووڵاتیانی ناوچەكە بە بەردەوامی هەوڵی دەرچوون و هەڵهاتن دەدەن لە ناحیەكە و خێزانێكی زۆر ئاوارەبوون.

لە كاتژمێر حەوتی بەیانی ئەمرۆوە لە ناحیەی سلێمان بەگ پاش ئەوەی چەكدارەكانی داعش و قاعیدە هێرشیان كردە سەر دامودەزگا حكوومییەكانی ناوچەكە، شەروپێكدادان لە نێوان ئەو چەكدارانە و هێزەكانی پۆلیسی فیدراڵی و سوپای عێراق دەستی پێكردووە و زۆربەی ناوچەكە كەوتۆتە ژێر كۆنترۆڵی چەكدارەكانەوە و تاوەكو ئێستاش شەڕەكە بەردەوامە و تێدا چەكی قورسی جۆراو جۆر بەكارهێنراوەوە.