كۆبوونەوەی نێچیرڤان بارزانی، سەرۆكی شاندی دانوستاندنكاری پارتی دیموكراتی كوردستان ‌و نەوشیروان مستەفا، رێكخەری گشتیی بزووتنەوەی گۆڕان بەمەبەستی یەكلاكردنەوەی پێكهێنانی حكومەت لە شاری سلێمانی كۆتاییهات، بەڵام هیچ ئەنجامێكی بۆ راگەیاندنەكان ئاشكرا نەكرا.

ئەمڕۆ چوارشەممە نێچیرڤان بارزانی، راسپێردراو بۆ پێكهێنانی كابینەی نوێی حكومەت لەلایەن پارتی دیموكراتی كوردستانەوە، لەگەڵ شاندێكی حیزبەكەی، كە پێكهاتبوو لە فازڵ میرانی، سكرتێری مەكتەبی سیاسی و ئازاد بەرواری، ئەندامی مەكتەبی سیاسی و رۆژ نو‌وری شاوێس، ئەندامی مەكتەبی سیاسی گەیشتە سلێمانی.

كۆبوونەوەكە، كە دوور لە چاوی میدیا بەڕێوەچوو كۆتاییهات ‌و هیچ ئەنجامێكیشی بۆ راگەیاندنەكان باس نەكرا.

پێشتر شەماڵ عەبدولوەفا، بەرپرسی ژووری پەیجووری بزووتنەوەی گۆڕان بە رووداوی گوت "ئێمە وەك گۆڕان نەرمیی زۆرمان نواندووە بۆئەوەی حكومەت زوو پێكبێت".

روونیكردەوە ، كە بۆ ئەو مەبەستە 3 سیناریۆیان داوەتە پارتی بۆ ئەوەی یەكێكیان هەڵبژێرن، "بۆیە رەنگە ئەمڕۆ وەڵامی یەكێك لە سیناریۆیانەمان بدەنەوە".







رووداو