پۆلیسی ھەولێر رایگەیاند، لە بۆنەکانی سەری ساڵی زایینیدا, لە ٢٥ ئەم مانگەوە بۆ ماوەی ١٠ رۆژ ھێزەکانیان بە ھاوکاریی پۆلیسی ھاتوچۆ و زێرەڤانی و ئاسایش، ئامادەکارییەکیان بۆ پاراستنی سەر و ماڵی ھاوڵاتیان کردووە، ھاووڵاتیانی دڵنیا کردەوە.


گوتەبێژی فەرمیی پۆلیسی پارێزگای ھەولێر رائید کاروان عەبدولکەریم ئاشکرایکرد: سەرجەم ھێزەکانیان بە ھەماھەنگیی پۆلیسی ھاتوچۆ و زێرەڤانی و ئاسایش، خستووەتە ئامادەباشییەوە و لە ٢٥/١٢/٢٠١٣وە تا ٥/١/٢٠١٤، لە ئامادەباشیدا دەبن بۆ پاراستنی ئەمنییەت و ئاسایشی ئەو شوێنانەی کە بە بۆنەی سەری ساڵەوە ئاھەنگیان تێدا ساز دەکرێت.

رائید کاروان روونیشیکردەوە: جگە لە پاراستنی ئەمنییەتی ئەو شوێنانەی کە ئاھەنگیان تێدا بەڕێوە دەچێت، لە رێگەی تیمی گەڕۆکەوە سەر و ماڵی ھاوڵاتیان لە شەوی سەری ساڵدا دەپارێزرێت، بۆ ئەو مەبەستەش بە شێوەیەکی بەردەوام مەفرەزەی گەڕۆک بەناو گەڕەک ‌و کۆڵانەکاندا دەسووڕێنەوە.