لە دیدارێكی تایبەتدا بۆ گۆڤاری گوڵان بولنت ئاراس دەڵێ: جێی داخە كە كۆمەڵگای نێودەوڵەتی بەو جۆرە مامەڵە لەگەڵ رژێمێكی وەك بەشار ئەسەد دەكات، ئێمە هیچ دەسەڵاتێكمان نییە لە سەرووی ئیرادەی نێودەوڵەتیەوە كە رێساگەلێكی دیاریكراو بەسەر ئەم جۆرە تاوانانەدا بسەپێنێت، هەروەها سیستمێك نییە دادپەروەری بهێنێتەدی و رێگە لە ئەنجامدانی تاوان دژی كۆمەڵگەكەی بگرێت، سەرۆك وەزیران ئەردۆغان و وەزیری دەرەوە داود ئۆغڵۆ رەخنەیان لەم سیستمە نێودەوڵەتیە گرتوەو و رایانگەیاندوە كە دادپەروەری و یەكسانی تێدانییە. ئەوەی لە سوریادا روودەدات ئەوەیە كە كۆمەڵە وڵاتێك پێیانوایە ئەوەی روودەدات تاوانە، بەڵام سیستمێك نییە رووبەڕووی ئەسەد بێتەوە لەسەر ئەم تاوانە. بەڵام جێی داخە كە كۆمەڵە وڵاتێكی دیكە هەن كە بێدەنگن و تەنانەت دەچنە پاڵ ئەسەد لە تاوانەكانیدا دژی سوریەكان و دژی مرۆڤایەتی.

هەروەها بولنت باسی دەسەڵاتی بەشار ئەسەد دەكات و دەڵێ: پێموانییە ئەسەد دەسەڵاتی ئەوەی هەبێت كۆنتڕۆڵی سەرتاسەری سوریا بكاتەوە، لەبەر ئەوەی موعارەزەیەكی راستەقینەی ناوخۆیی هەیە لە دژی، یەكەم شتیش كە پێویستە بیكات ئەوەیە عەقڵ و سۆزی خەڵك بەلای خۆیدا رابكێشێت، بەڵام زەحمەتە ئەمەشی بۆ بكرێت، لەلایەكی دیكە ئۆپۆزسیۆنیش هەیە كە تەحددای رژێمەكەی ئەسەد دەكات، هەروەها ناوچەیەكی جوگرافیی كوردی هەیە لە سوریا كە ئەسەد كۆنتڕۆڵێكی زۆری ئەو- جوگرافیایەی بەدەستەوە نییە-، بەڵام هێشتا ئەسەد ماوەتەوە، ئەویش بە شێوەیەكی سەرەكی هۆكارەكەی بۆ نەبوونی سیستمێكی عەدالەتی نێودەوڵەتی دەگەڕێتەوە و بۆ سەرنجنەدان لە تاوانەكانی دەگەڕێتەوە. بەڵام ئەمە بە مانای ئەوە نایەت كە دەمێنێتەوە، لە رووی مێژووییەوە هەموو سەركردە تۆتالیتاریەكان رۆیشتوون، رەنگە بۆ ماوەیەك بمێنێتەوە، بەڵام درەنگ یان زوو لە كەشی سیاسی سوریادا دەسڕێتەوە.

ئاراس هەروەها گوتی : پێش هەموو شت كۆنگرەی جنێڤ 2 بە مانای دووبارە چەسپاندنەوە و پشتیوانیكردنی ئەسەد نایەت، بەڵكو بیرۆكەكە ئەوەیە هەمووان بەشداربن بۆ ئەوەی بگەنە چارەسەرێكی كۆتایی، ئاشكرایە كە موعارەزە زۆر بەربڵاوە و یەكگرتوو نییە. ئەوە سروشتی دۆخی شەڕە و بەڕێز ئەردۆغانیش ویستی گفتوگۆیان لەگەڵدا بكات و یەكیان بخات، لەبەر ئەوەی ئامانجی هاوبەشیان هەیە كە هەموو لایەكیان لەگەڵ دوورخستنەوەی ئەسەدن لە دەسەڵات و لەگەڵ دروستكردنی دەوڵەتێكی نوێن، و ئاشتەواییش لە نێوانیاندا لە بەرژەوەندی ئایندەی وڵاتەكەیە.


بۆ خوێندنەوەی بابەتەكە لە ژمارەی (975)ی گۆڤاری گوڵاندا.