سەرۆكی هەرێمی كوردستان پێشوازی لە باڵیۆزی ئۆستڕالیا لە عێراقی فیدڕاڵ كرد
لە دیدارێكدا سەرەتا باڵیۆزی ئۆستڕالیا خۆشحاڵیی خۆی بۆ دیدار لەگەڵ سەرۆك بارزانی و سەردانی بۆ كوردستان نیشان دا و ئاماژەی بەوەدا كە جوانی و سەقامگیریی كوردستان ڕەنگدانەوەی ئەو پێشكەوتنانەیە كە هەرێمی كوردستان لەم چەند ساڵەدا بەخۆیەوە بینیویەتی. هەروەها سڵاوی خەڵكی ئۆستڕالیا و حكوومەتی تازەی ئۆسترالیای بە گەلی كوردستان و سەرۆك بارزانی ڕاگەیاند و ئامادەیی وڵاتەكەشی نیشاندا بۆ بەرەوپێشڤەبردنی پەیوەندییە سیاسی و ئابوورییەكانی هەردوولا و هەروەها هاوكاریكردنی هەرێمی كوردستان لەبوارەكانی پەروەردە و خوێندنی باڵا. هەر لەم دیدارەدا باڵیۆزی ئۆستڕاڵیا ئەوەی خستەڕوو كە خەڵكی وڵاتەكەی خەڵكێكی كراون و ئۆستڕالیا لە زۆر بواردا پێشكەوتووە و حەزی لێیە كە لە بووژانەوەی هەرێمی كوردستاندا بەشدار بێت.
لەبەرانبەردا سەرۆك بارزانی بەخێرهاتنی باڵیۆزی ئوستڕالیای كرد و سپاسی گەل و حكوومەتی نوێی ئۆستڕالیاشی كرد و هەروەها وێڕای ئاماژەپێدان بە ڕۆڵی وڵاتی ئۆستڕالیا لە بواری ئابووری و زانست و پیشەسازی لە جیهاندا سەرۆك بارزانی خۆشحاڵیی خۆیشی نیشاندا بەوەی كە پەیوەندییەكانی هەردوو وڵات لە بوارە جۆراوجۆرەكاندا بەرەو پێشەوە بچێت.
لەم دانیشتنەدا بارودۆخی سیاسیی ناوچەكە و پەیوەندییەكانی هەرێم و بەغدا و قەیرانی سووریا و هەروەها هەڕەشەی تیرۆر لەسەر تێكدانی سەقامگیری و ئاساییشی وڵاتان خرانە بەر باس و گفتوگۆ.
