شاندێكی كۆمه‌ڵه‌ی قورئانخوێنانی كوردستان له‌شاری هه‌ولێر سه‌ردانی وه‌زاره‌تی ئه‌وقاف و كاروباری ئاینیان كرد و له‌گه‌ڵ به‌رێز كامیل حاجی عه‌لی وه‌زیری ئه‌وقاف و مامۆستا عومه‌ر به‌رێوه‌به‌ری فێركردن و له‌به‌ركردنی قورئانی پیرۆز له‌وه‌زاره‌تی ئه‌وقاف كۆبونه‌وه.


وه‌زیری ئه‌وقاف پیرۆزبایی له‌ده‌سته‌ی كارگێڕی نوێی كۆمه‌ڵه‌كه‌ كرد و به‌ڵێنی پشتگیری و هاوكاریكردنی پێدان و له‌به‌رامبه‌ردا ته‌ئكیدی له‌سه‌ر جێبه‌جێكردنی ئه‌و رێنماییانه‌ كرده‌وه‌ كه‌وه‌زاره‌تی ئه‌وقافی حكومه‌تی هه‌رێمی كوردستان سه‌باره‌ت به‌ پرسه‌ و قورئانخوێنه‌كان ده‌ریكردوه‌.

قورئانخوێنه‌كانی كوردستانیش دوپاتیان كرده‌وه‌ كه‌وا هاوكاری وه‌زاره‌تی ئه‌وقاف ده‌بن و له‌رۆژانی ئاینده‌شدا كۆمه‌ڵێك چالاكی و پلانی جۆراوجۆر سه‌باره‌ت به‌ به‌ره‌وپێشبردنی توانای قورئانخوێنه‌كان و خزمه‌تكردنی هاوڵاتیان ده‌خه‌نه‌ڕوو.

هه‌ر له‌م كۆبونه‌وه‌یه‌دا كۆمه‌ڵه‌ی قورئانخوێنان داوایان له‌راگه‌یاندنی وه‌زاره‌تی ئه‌وقاف كرد كه‌تیشك بخاته‌ سه‌ر كار و چالاكیه‌كانیان و له‌كه‌ناڵه‌كانی راگه‌یاندنی وه‌زاره‌تی ئه‌وقاف و حكومه‌تی هه‌رێمدا گرنگی به‌پلان و به‌رنامه‌ی كۆمه‌ڵه‌كه‌یان بدرێت.