ئێوارەی ئەمڕۆ پێنجشەممە 5ـی 12ـی 2013 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە عادل عەبدولمەهدی سەركردە لە ئەنجوومەنی باڵای ئیسلامیی عێراق و موحسن ئەلحەكیم كرد.

لە دیدارێكدا بارودۆخی سیاسی و ئەمنیی عێراق بەگشتی و بەغدا بە تایبەتی و هەروەها ئەو كاریگەرییانەی لە ئەنجامی خەراپیی بارودۆخی ئەمنیی عێراق دێنە كایەوە خرایە بەر باس و گفتوگۆ. هەروەها قسە لەسەر بەڕێوەچوونی پڕۆسەی هەڵبژاردنی ئەنجوومەنی نوێنەرانی عێراق و لێكەوتەكانی كرا كە بڕیارە لە كۆتایی مانگی چواری ساڵی داهاتوو ئەنجام بدرێت.

باری هەرێمایەتی و قەیرانە سیاسییەكانی ناوچەكە و ئاییندەی عێراقی فیدڕاڵ ئەو تەوەرانە بوون كە لەم دیدارەدا تاوتوێ كران. لەم كۆبوونەوەیەدا جەختیش لەسەر ئەوە كرایەوە كە دانیشتن و ڕاگۆڕینەوەكانی هەردوولا لەپێناو دۆزینەوەی چارەسەرێكی گونجاو بۆ داهاتووی عێراق بەردەوام بێت.