پێشنیوەڕۆی ئەمڕۆ پێنجشەممە 5ـی 12ـی 2013 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە باڵیۆز جۆن ویڵكس نوێنەری تایبەتی بریتانیا بۆ كاروباری سووریا كرد.

لە دیدارێكدا نوێنەری تایبەتی بریتانیا سوپاس و خۆشحاڵیی خۆی بۆ ڕەخساندنی دیدار لەگەڵ سەرۆك بارزانی ڕایگەیاند. لەو دانیشتنەدا نوێنەری تایبەتی بریتانیا بە ڕاشكاوی وێنەیەكی گشتی لە دواپێشهاتە سیاسییەكانی سووریا و هەوڵە نێودەوڵەتییەكان بۆ چارسەركردنی قەیرانی سووریا خستەڕوو و هەنگاوەكانی ئامادەكاریی كۆنفرانسی ژێنێڤ 2 و ڕۆڵی دەوڵەتانی دراوسێ و دۆستی سووریا و زلهێزەكان و هێزە سیاسییەكانی ناوخۆی سووریا و هەروەها كاریگەرییان لەسەر قەیرانی سووریا بۆ سەرۆك بارزانی شی كردەوە. نوێنەری تایبەتی بریتانیا پشتگیری وڵاتەكەیشی لە ڕۆڵ و پێگەی كورد بە تایبەت ئەنجوومەنی نیشتیمانی دووپات كردەوە و ئاماژەی بەوەدا كە پێویستە لە كۆنفڕانسی ژێنێڤ 2 ـدا كوردەكان بەشدار بن و ڕۆڵێكی كارایان هەبێ.
هەر لەو دانیشتنەدا هەردوولا لەسەر ئەوە هاوڕا بوون كە دەبێ ئەو لایەنانەی پەیوەندیدارن بە قەیرانی سووریا پشتگیری لە ڕۆڵی كورد بكەن و پێویستیشە هەموو لایەنە كوردییەكان هاوكاری یەكتر بن و گوتارێكی هاوبەش و ڕوونیان لە مامەڵەكردن لەگەڵ قەیرانی سووریا و دواڕۆژی سووریادا هەبێت.

سەبارەت بە بارودۆخی سووریا و كاریگەریی لەسەر ناوچەكە و ڕۆڵی كورد سەرۆك بارزانی هێمای بەوە كرد كە ئەستەمە كێشەی سووریا لە ڕێگەی چارەسەری سەربازی چارەسەر بكرێت و ئەوەی بەلای هەرێمی كوردستانیشەوە گرنگە ئەوەیە كە ئەلتێرناتیڤێكی دیموكراتی بۆ دواڕۆژی سووریا هەبێت و ئۆپۆزیسیۆنی سووریا و گشت لایەك ڕەچاوی مافەكانی كورد بكەن چونكە داواكاری و مافەكانی كورد ڕەوان و لە سووریادا گەلی كورد لە بچووكترین مافەكانی بێبەش كراوە.