گوتەبێژی زانكۆی راپەڕین رایگەیاند: لە هەوڵدان بۆ ئەوەی چەند كۆلێژو بەشێك بكەنەوە بەڵام كردنەوەی هەریەك لەو بەشانە لە دەسەڵاتی ئێمە نیەو دەبێت وەزارەتی خوێندنی باڵا رەزامەندی لەسەر بدات.



ئاراس رەمەزان ، لە لێدوانێكدا بە پەیامنێری راگەیاند: هەندێ‌ راگەیاندن وایان بڵاوكردۆتەوە كە گوایە كۆلێژێكی (شەریعە) لەزانكۆی راپەڕین دەكرێتەوە كە ئێمە لە ئێستادا ئەو هەواڵە رەتدەكەینەوە و كاتێك زانكۆی راپەڕین بەپێویستی بزانێت ئەگەری هەیە لە ئایندەدا بەشی شەریعە دەكاتەوە نەك كۆلێژی شەریعە.


گوتیشی، بۆ زانیاری زیاترو بەرچاو ڕوونی میدیاكان و هاووڵاتیانی سنورەكە كردنەوەی بەش و كۆلێژی زانستی لەهەر زانكۆیەك لە دەسەڵاتی وەزارەتی خوێندنی باڵاو توێژینەوەی زانستی حكومەتی هەرێم دایە و زانكۆكان تەنیا پێشنیاز دەكەن بەپێی پێویستی و زەروریەتی زانستی ناوچەكە و بوونی هەموو پێداویستیەكان لەو بوارە پسپۆڕیەدا ئینجا رەزامەندی لەسەر دەدرێت.


ئاراز رەمەزان هێمای بۆ ئەوەشكرد: كە زانكۆی راپەڕین لەم قۆناغەدا بەپێویستی دەزانێت لەسنورەكەدا زیاتر بەش و كۆلێژی زانستی بكرێنەوە بۆ دەڤەرەكەو لەو ڕووەشەوە لەهەوڵی بەردەوامدایە بۆ ئەوەی لەساڵانی ئایندەدا بەشە زانستی و كۆمەڵایەتیەكان لە زانكۆكەدا بكرێنەوە.