عوسمان ئۆجەلان: سەردانەكەی بارزانی بە ئاگاداریی ئۆجەلان بووە
عوسمان ئۆجەلانی برای عەبدوڵڵا ئۆجەلان كە ئەندامی پێشووی كۆنسەی سەرۆكایەتیی پەكەكە بووە بە ژمارەی ئەمڕۆی ڕۆژنامەی \""ئاوێنە\""ی ڕاگەیاندووە، \""ئەم سەردانە بە ئاگاداری و ئیتیفاقی پێشوەختە بووە لەگەڵ ئاپۆ، ئەگەر ئاپۆ بیوتایە نا، ئەوا پەكەكە دەیتوانی دژایەتییەكی گەورەی بكات و پەكی بخات، ڕاستە پەكەكە و پەیەدەیش پێیانخۆش نەبوو، بەڵام لە دژیشی نەوەستان و پێشوازیشیان لێ كرد لە شارەوانیی ئامەد.\""
ئۆجەلان سەردانەكەی سەرۆكی هەرێمی كوردستان بۆ باكووری كوردستان بە سەركەوتوو ناو دەبات و ڕوونی دەكاتەوە، \""ڕۆژهەڵاتی نێوەڕاست لە هەلومەرجێكی هاوشێوەی جەنگی یەكەمی جیهانییە و دوای ئەم شەڕەیش سیستمێكی نوێ دادەمەزرێت كە ڕێككەوتنی كورد و تورك دەبێتە هۆی بەهێزبوونیان، هەربۆیە سەردانی بارزانی لە بەرژەوەندیی پرۆسەی ئاشتیدا دەبینم.\""
ئەو ئاماژەیش دەدات بەوەی كە بزوێنەری ئاشتی بە پلەی یەكەم ئۆجەلان و ئەردۆغانن، بەڵام دەڵێت \""ئەم سەردانەی بارزانیش دەتوانێت پشتگیری ئەو ئاشتییە بكات. ئەم سەردانە بۆ ئەوە نەبووە كە بارزانی شوێنی ئاپۆ بگرێت، بەڵكو پشتگیرییەكی جیددی بوو بۆ ئاشتی لە باكووری كوردستان و ئەو پشتگیرییەیش پێویستە؛ بە حوكمی ئەوەی هەرێمی كوردستان بووەتە ناوەندی تێكۆشانی كورد لە ناوچەكەدا."
