ئه‌مڕۆ دووشه‌ممه‌ نێچیرڤان بارزانی جێگری سه‌رۆكی پارتی دیموكراتی كوردستان و كه‌سایه‌تی راسپێردراوی پارتی بۆ پێكهێنانی كابینه‌ی هه‌شته‌می حكوومه‌تی هه‌رێم، بۆ گفتوگۆ و دانووستاندن له‌گه‌ڵ لایه‌نه‌ براوه‌كانی هه‌ڵبژاردن ده‌چێته‌ سلێمانی.

نێچیرڤان بارزانی و شاندی یاوه‌ری بڕیاره‌ له‌ یه‌كه‌م وێستگه‌ی گفتوگۆكانیاندا له‌گه‌ڵ یه‌كێتی نیشتمانی كوردستان بێت كه‌ شاندی یه‌كێتی له‌لایه‌ن به‌رهه‌م ئه‌حمه‌د ساڵح جێگری دووه‌می سكرتێری گشتی یه‌كێتی، سه‌رۆكایه‌تی ده‌كرێت.

بڕیاریشوایه‌ دوای كۆبوونه‌وه‌كه‌ له‌گه‌ڵ شاندی یه‌كێتی، شاندی پارتی سه‌ردانی گردی زه‌رگه‌ته‌ بكه‌ن و له‌گه‌ڵ بزووتنه‌وه‌ی گۆڕان گفتوگۆی پێكهێنانی كابینه‌ی هه‌شته‌م بكه‌ن.

شاندی دانووستانكاری بزووتنه‌وه‌ی گۆڕان له‌لایه‌ن نه‌وشیروان مسته‌فا رێكخه‌ری بزووتنه‌وه‌كه‌ سه‌رۆكایه‌تی ده‌كرێت.

هه‌ر له‌ چوارچێوه‌ی ئه‌و سه‌ردانه‌ی شاندی پارتی به‌ سه‌رۆكایه‌تی نێچیرڤان بارزانی بۆ سلێمانی، گفتوگۆی پێكهێنانی كابینه‌ی هه‌شته‌می حكوومه‌تی هه‌رێمی كوردستان له‌گه‌ڵ یه‌كگرتووی ئیسلامی كوردستان ده‌كرێت.

پرۆسه‌ی هه‌ڵبژاردنی چواره‌مین خوولی په‌رله‌مانی كوردستان له‌ سه‌ر هه‌ر سێ پارێزگاكه‌ی هه‌رێمی كوردستان (هه‌ولێر، سلێمانی و دهۆك) له‌ 21ی ئه‌یلول / سه‌پته‌مبه‌ر 2013 به‌ڕێوه‌چوو كه‌ به‌پێی دوا راگه‌یه‌ندراوی كۆمسیۆنی باڵای سه‌ربه‌خۆی هه‌ڵبژاردنه‌كان له‌ عێراق، جگه‌ له‌ 11 كورسییه‌كه‌ی كۆت كه‌ پێنج كورسی بۆ توركمانه‌كان، پێنج كورسی بۆ ئاشورییه‌كان، یه‌ك كورسی بۆ ئه‌رمه‌نییه‌كان، ئه‌نجامی ده‌نگدانه‌كه‌ به‌م شێوه‌یه‌ بوو:

1- پارتی دیموكراتی كوردستان (743984) ده‌نگ = 38 كورسی

2- بزوتنه‌وه‌ی گۆاڕن (476736) ده‌نگ =‌ 24 كورسی

3- یه‌كێتیی نیشتمانیی كوردستان (350500) ده‌نگ =18 كورسی

4- یه‌كگرتووی ئیسلامی كوردستان (186741) ده‌نگ =10 كورسی

5- كۆمه‌ڵی ئیسلامی كوردستان (118574) ده‌نگ =6 كورسی

6- بزوتنه‌وه‌ی ئیسلامی كورستان (21834) ده‌نگ =1 كورسی

7- حزبی شۆسیالیستی دیموكراتی كوردستان (12501) ده‌نگ =1 كورسی

8- حزبی ئازادی كوردستان (12392) ده‌نگ =1 كورسی

9- هاوپه‌یمانی ئاڕاسته‌ی سێییه‌م(8681) ده‌نگ =1 كورسی