سه‌باره‌ت به‌ پلاماردانی كۆنسوڵخانه‌ی كۆماری ئیسلامی ئێران له‌ هه‌ولێر له‌لایه‌ن هه‌ندێك رێكخراوی كۆمه‌ڵگه‌ی مه‌ده‌نی؛ وه‌زاره‌تی ناوخۆی هه‌رێمی كوردستان روونكردنه‌وه‌یه‌كی بڵاوكرده‌وه‌ ئه‌مه‌ ده‌قه‌كه‌یه‌تی: ژماره‌یه‌ك رێكخراوی كۆمه‌ڵگه‌ی مه‌ده‌نی داواكاری وه‌رگرتنی مۆڵه‌تیان پێشكه‌ش به‌ پارێزگای هه‌ولێر كرد بۆ ئه‌نجامدانی گردبوونه‌وه‌یه‌ك له‌ رۆژی هه‌ینی هه‌شتی یازده‌ی دوو هه‌زار و سێزده‌ له‌ پاڕكی شانه‌ده‌ر.

پارێزگای هه‌ولێریش له‌ سۆنگه‌ی بڕوابوون به‌ مافی هاووڵاتییان له‌ ده‌ربڕینی بیروڕا و جێبه‌جێكردنی یاسا مۆڵه‌تی پێ دان، به‌ڵام دوای ته‌واوبوونی گردبوونه‌وه‌كه‌ و بڵاوه‌كردنیان به‌ داخه‌وه‌ هه‌ندێكیان به‌ره‌و كونسوڵخانه‌ی كۆماری ئیسلامی ئێران چوون و كاری نایاسایی و گێره‌ شێوێنیان ئه‌نجام دا.

لێره‌دا ئێمه‌ وه‌ك وه‌زاره‌تی ناوخۆ ئه‌م كاره‌ گێره‌شێوێنییه‌ به‌توندی ئیدانه‌ ده‌كه‌ین و راشی ده‌گه‌یه‌نین كه‌ ئه‌نجامده‌رانی رووبه‌ڕووی سزای یاسایی ده‌كه‌ینه‌وه‌. وته‌بێژی فه‌رمی وه‌زاره‌تی ناوخۆی هه‌رێمی كوردستان.