ئاوارەكانی كەمپی باسرمەی سنووری شارۆچكەی شەقڵاوە گلەیی لەوە دەكەن كە قوتابخانەیەك بۆ منداڵەكانیان كراوەتەوە بەڵام قۆناغی ئامادەیی تێدانیەو بەڕێوەبەری شارەدێی باسرمەش دەڵێت ئەو گرفتە چارەسەر دەكەین.


سوارە ئەكرەم، بەڕێوەبەری شارەدێی باسرمە بە پەیامنێری ڕاگەیاند: ئێستا قوتابخانەیەكی بنەڕەتی بۆ قوتابیانی ئاوارەكانی كەمپی باسرمە دروستكراوەو بەڕووی قوتابیانی كەمپەكە كراوەتەوەو خوێندن تێدا دەستی پێكردوە.



گووتیشی،بەڵام قوتابیانی ئامادەیی بەهۆی بەرتەسكی و نەبوونی پێویستی خوێندن لە خوێندن بێبەش بوون بۆیە بەهاوكاری پارێزگای هەولێر لەكارداین كە قوتابخانەیەكی فراوانتر لەشێوەی كابینە لە كەمپەكە دروستبكەین و دەوامی قوتابخانەكە بكەینە دوو دەوامی یەكێكیان بۆ بنەڕەتی و دەوامێكیش بۆ ئامادەیی و ئەو گرفتەیان بۆ چارەسەر بكەین.

بە گوتەی بەڕێوەبەری شارەدێی باسرمە قوتابیانی ئاوارەكانی كەمپەكە بەهەردوو قۆناغەكەوە نزیكەی 800 قوتابی دەبێت.