چەند کوتلەیەکی سیاسی ئەنجوومەنی نوێنەران لە دەنگدان بە پرۆژەی یاسایی زمانە فەرمییەکان, دەنگیان بە بڕگەی پێنجەمی پرۆژەکە نەدا بۆ ئەوەی زمانی کوردی وەک عەرەبی بە فەرمی نەکرێت, لە بەرامبەردا نوێنەرێکی کورد ئەو کارە بە شۆڤینیستی وەسف دەکات و دەشڵێت: زمانی کوردی بەپێی دەستوری عێراق فەرمیە و پێویستە دەنگ لەسەر پرۆژەکە بدرێت.

مەحما خەلیل ئەندامی ئەنجومەنی نوێنەرانی عێراق لە فراکسیۆنی کوردستانی بەئاژانسی ھەواڵی پەیامنێری ڕاگەیاند: لە کۆبونەوەی ئاسایی نوێنەراندا بڕیار بوو دەنگ لەسەر پرۆژە یاسایی زمانە فەرمییەکان بدرێت و توانرا دەنگ لەسەر چوار بڕگەی پرۆژەکە بدرێت و چەند لیستیکی سیاسی دەنگیان لەسەر پێنجەم بڕگە نەدا بۆ ئەوەی زمانی کوردی ھاوشێوەی زمانی عەرەبی بێت لەسەرجەم فەرمانگە و بەڵگەنامەکانی عێراق, ھەرچەند داوایان کردبوو کە لەسەرتاوە دەنگ لەسەر پرۆژەکە بدرێـت, بەڵام ئێمە وەکو فراکسیۆنی کوردستانی لەسەر ئەو داوایە ڕازی نەبووین.

وتیشی: دوابەدوای کۆبونەوەکە ئەنجومەن, کۆبونەوەیەکمان لەگەڵ سەرۆکی لیستە سیاسییەکان ئەنجام دا بۆ ئەوەی بگەینە رێکەوتنێک لەسەر پرۆژەکە چونکە ئەو پرۆژەیە بەرژەوەندی سەرجەم لەلایەنەکانی تێدایە وەکو کورد, تورکمان, کلدان و چەند زمانیکی دیکە و بەپێی دەستوری عێراقیش لەچەند بڕگەیەکیدا ھاتووە \"زمانی کوردی ھاوشیوەی زمانی عەرەبیە\"" و بەزمانیکی فەرمی وەسفی کردووە.

تا ئێستا کوتلە سیاسییەکان لەسەر ئەو پرۆژەیە رێکنەکەوتن و چەندین کۆبونەوە لەگەڵ سەرۆکی کوتلەکان ئەنجام درا بۆ ئەوەی بگەن بەرێکەوتنێکی سیاسی بۆ دەنگدان لەسەر پرۆژە یاسایی زمانە فەرمییەکان"