دوای نیوەڕۆی ئەمڕۆ لە دەرەوەی شاری ھەولێر، یەک تۆن ماددەی ھۆشبەر لەلایەن بەڕێوەبەرایەتیی نەھێشتنی ماددە ھۆشبەرەکان سووتێندرا کە لە ماوەکانی رابردوو دەستیان بەسەرداگرتبوون.


بەڕێوەبەری نەھێشتنی ماددە ھۆشبەرەکان سەربە ئەنجومەنی ئاسایشی کوردستان لیوا \"عادل بۆتانی\"" لە کۆنگرەیەکی رۆژنامەنووسیدا گوتی: ئەو بڕە ماددە ھۆشبەرەی ئەمڕۆ دەسوتێندرێت، بڕەکەی یەک تۆنە و لە ١٤ماددە پێکھاتوون. ٣٥٠کەسیش دەستگیرکراون کە ئەو ماددانەیان پێبووە، بەشێکیان بازرگان بوون و بەشێکیشیان بەکارھێنەر بوونە.

بۆتانی رایگەیاند: بەشێک لەو ماددانە بۆ کوردستان ھێنراون و بەشێکیشیان وەک ترانزێت کوردستانیان بەکارھێناوە و لە ئەنجامی ھاوکاریی ھاوڵاتیان و ھێزەکانی پۆلیس و ئاسایش، دەستگیر کراون.


بەپێی ئەو زانیارییانەی دەست پەیامنێر کەوتوون، ئەو ماددە ھۆشبەرانە دوا قۆناغەکانی تێبینی دادوەری و سەلمێنەرییان وەک بەڵگە تێپەڕاندووە و لەسەر بڕیاری دادوەر لەناوبران."