بە بۆنەی هاتنەوەی جەژنی قوربانی پیرۆزەوە، بەناوی سەرۆكایەتی ئەنجومەنی وەزیران گەرمترین پیرۆزبایی لە سەرجەم موسڵمانانی هەرێمی كوردستان بە تایبەتی و عیراق و جیهان بە گشتی دەكەین.

هیوادارین جەژنی قوربان ببێتە مایەی خێروخۆشی و بەختەوەری بۆ هەموولایەك و هەرێمی كوردستانیش لە پێشكەوتن و ئارامی و خۆشگوزەرانی بەردەوام بێت.

ئەگەرچی بەم دواییە دوژمنانی ئەزموونەكەمان ویستیان رەوڕەوەی دیموكراسی و پێشكەوتن و ئاسوودەیی هاوڵاتیان بووەستێنن، بەڵام پارێزەرانی ئەم ئەزموونە باوەشیان بە مەرگدا كرد و نەیانهێشت پیلانی دوژمنانی گەلەكەمان سەربكەوێت.

هەرێمی كوردستان ئەمڕۆ لە هەموو كات زیاتر پێویستی بە یەكڕیزی و برایەتی و تەبایی و پێكەوە ژیان و لێبوردەیی هەیە بۆ بونیاتنانی كۆمەڵگایەكی پێشكەوتووی سەقامگیر. هیوادارین جەژن ببێتە فاكتەرێك بۆ گەیشتن بەم ئامانجە پیرۆزە.

هەر بەم بۆنەیەوە بە گەرمی پیرۆزبایی لە خانەوادەی سەربەرزی شەهیدان و پێشمەرگە و ئاسایش و پۆلیس و تەواوی كارمەندانی ناوخۆو تەندروستی و هەموو ئەو بەڕێزانە دەكەین كە لە رۆژانی جەژن، دوور لە خانەوادەو كەس و كاریان رۆژانی جەژن بۆ ئاسوودەیی و پاراستنی ژیانی هاوڵاتیان بەسەر دەبەن.

دووبارە جەژن لە هەموولایەك پیرۆزبێت و هەر لە خۆشی بەختەوەریدابن.

سەرۆكایەتی ئەنجومەنی وەزیران