پاش نیوەڕۆی ئەمڕۆ چەند چەكدارێك بە دوو ئۆتۆمبێلی بۆمبڕێژكراو هێرشیان كردە سەر بەڕێوەبەرایەتی ئاسایشی گشتی هەولێر، لە بەرامبەردا رێكخراوی قاعیدە لە (تویتێكدا) ستایشی هێرشەكانی كرد.

رێكخراوی قاعیدە لە پەیجی فەرمی خۆی لە تۆڕی كۆمەڵایەتی (تویتەر) لە تویتێكدا بەپەلەیەكی نووسیوەو دەڵێ \"چەند هێرشێك بە تەقینەوەو پێكدادان باڵەخانەی ئاسایش و وەزارەتی ناوخۆ لە شاری هەولێری پایتەختی هەرێمی كوردستان دەكەنە ئامانج، خودایە پاڵپشتی هێرشبەران و ئامانجەكانیان بە\"".

لە راپۆرتێكدا كە سایتی (ئیلاف) ئەمڕۆ بە پشتبەستن بە زانیاری چەند دەزگایەكی ئەمریكی بڵاویكردووەتەوە:

\""لینكی (@shomokhalislam) لینكی پەیجی فەرمی رێكخراوی قاعیدەیە لە تۆڕی كۆمەڵایەتی تویتەر\"".

دەزگای ئاسایشی هەرێم لە راگەیەنراوێكدا چۆنێتی روودانی تەقینەوەكانی ئەمڕۆی شاری هەولێری خستەڕوو دەڵێ \""تەقینەوەكان تیرۆیستی بوون\"".

لە راگەیەنراوەكەی ئاسایشدا هاتووە \""كاتژمێر 1:24 دوا نیوەرۆی ئەمڕۆ 29-9-2013، پەلامارێكی تیرۆریستی كرایە سەر بارەگای بەڕێوەبەرایەتی ئاسایشی هەولێر. لەسەرەتادا ئۆتۆمبێلێكی جۆری مینی پاسێك خۆكوژێكی تێدابووە ویستوویەتی بچێتە ناو بارەگای ئاسایش و لەوكاتەدا لەلایەن پاسەوانانی ئاسایش تەقەی لێدەكرێت و لە ئەنجامدا ئۆتۆمبێلەكە لەبەردەرگای سەرەكی دەتەقێتەوە و لەوكاتەدا 4 خۆكوژ بە چەك و رومانەوە هەوڵدەدەن بچنە ناو بارەگای ئاسایشی هەولێر\"".

ئەوەش خراوەتەڕوو \""هەرچوار تیرۆریستە خۆكوژەكە لەلایەن پاسەوان و كارمەندانی ئاسایشەوە دەكوژرێن، لەدوای چەند خولەكێك تیرۆریستێك بە ئامبولانسێك لە بارەگای ئاسایش نزیك دەبێتەوە و دوای ئەوەی رادەگیرێت خۆی دەتەقێنێتەوە\"".

راگەیەنراوەكەی دەزگای ئاسایشی هەرێم ئاماژەی بە ژمارەی قوربانییەكانی سەر بە هێزەكانی ناوخۆو ژمارەی كوژراوانی خۆكوژەكانی لەكاتی رووبەڕووبوونەوەكەدا كردووەو دەڵێ \""6 تیرۆریست كوژراون و بەداخەوە لە كاتی بەرگریكردنی قارەمانانەی كارمەندانی ئاسایشدا 6 كارمەندی ئاسایش شەهیدبوون و (42) كەس لە كارمەندی ئاسایش و پۆلیس و بەرگری شارستانی برینداربوون\"".



رووداو"