سەرۆكی هەرێمی كوردستان پێشوازی لە شاندێكی لیستی ئەلعراقیە دەكات
لە سەرەتای دیدارەكەدا شاندی میوان خۆشحاڵیی خۆیان بۆ ڕەخساندنی ئەم دیدارە دەربڕی و سەقامگیری و پڕۆسەی دیموكراسیی هەرێمی كوردستانیان بە نموونەیی و هیوایەكی گرنگ بۆ عێراق وەسف كرد كە لەسایەی سەرۆك بارزانیدا هاتووەتە ئاراوە.
دواتر ئەیاد عەلاوی سەرۆكی لیستی عێراقییە كورتەیەكی لە بارودۆخی سیاسی و ئەمنی و ئابووری و كۆمەڵایەتیی عێراق بۆ سەرۆك بارزانی باس كرد و بە پێویستی زانی كە بارودۆخی سیاسی عێراق بكەوێتە سەر ڕێگەیەكی دروستەوە و هەموو هێزە سیاسییەكان لە هەوڵی بەردەوامدا بن بۆ دووركەوتنەوە لە تاییفەگەری و هێزە سیاسییەكان خزمەتگوزاری و چالاكیی نیشتیمانی بكەنە پێوەری كاری خۆیان.
لای خۆیەوە سەرۆك بارزانی پاش بەخێرهێنانی شاندی میوان لەبارەی بارودۆخی سیاسیی عێراق هێمای بەوەدا كە پڕۆسەی سیاسیی عێراق پێویستی بە نیازپاكی و پابەندبوون هەیە بە ڕێككەوتنی نێوان لایەنە سیاسییەكان و هەروەها پێویستە هێزە سیاسییەكان ئیرادەیەكی سەربەخۆی نیشتیمانیان هەبێت و ئامانجی سەرەكییان سەقامگیریی وڵات و ئاسوودەیی هاووڵاتیان بێت. سەبارەت بە هەڵبژاردنی پارلەمانی كوردستانیش سەرۆكی هەرێمی كوردستان ئاماژەی بەوەدا كە هەڵبژاردنی پارلەمان هەنگاوێكی دیكەیە بۆ پتەوتربوونی بنەماكانی دیموكراسیی هەرێم و پڕۆسەی هەڵمەتی بانگەشەی هەڵبژاردن لە هەرێمی كوردستاندا بەشێوەیەكی سرووشتی بەڕێوە دەچێت.
لەبەشێكی دیكەی دانیشتنەكەدا سەرۆك بارزانی پەیام و ئامانجەكانی كۆنگرەی نەتەوەیی كورد بۆ شاندی میوان شی كردەوە و ڕایگەیاند كە پەیامی كۆنگرەی نەتەوەیی كورد بۆ گەلانی ناوچەكە و جیهانی دەرەوە پەیامی ئاشتی و پێكەوەژیان و دووركەوتنەوەیە لە توندوتیژییە.
بارودۆخی سیاسیی ناوچەكە و قەیرانی سووریا و دواڕۆژی سیاسیی سووریا تەوەرێكی دیكەی دانیشتنەكە بوو.
