سه‌رۆكی هه‌رێمی كوردستان له‌ په‌یامێكدا رایگه‌یاند، ئومێدێكی زۆر هەیە گەلەكەمان لەو بەشی رۆژئاوای كوردستان بە پاراستنی یەكڕیزی و یەكدەنگی مافەكانی مسۆگەر بكات، ئەو ئازیزانەی ناوچەكانیان كەوتووەتە بەر هێرش و شەڕی تێدایە ئەوە هەرێمی كوردستان ماڵی خۆیانە داواشی لەو خوشك و برایانه‌ كرد كە هێشتا لە ڕۆژئاوای كوردستاندا نیشتەجێن، چیدی خاكەكەیان بەجێ نەهێڵن و چۆڵی نەكەن، وتیشی، چۆڵبوونی ڕۆژئاوای كوردستان لە بەرژەوەندیی نەیارانی گەلی كوردە.



ئه‌وه‌ش ده‌قی په‌یامه‌كه‌یه‌:



بەناوی خودای بەخشندە و میهرەبان



خوشك و برا ئازیزەكانم لە ڕۆژئاوای كوردستان



ڕۆژئاوای كوردستان لە بارودۆخێكی تایبەت و هەستیاردا دەژییت. ئومێدێكی زۆر هەیە گەلەكەمان لەو بەشەی كوردستاندا بە پاراستنی یەكڕیزی و یەكدەنگی مافەكانی مسۆگەر بكات. بەدەستهێنانی مافە نەتەوەییەكان پێویستی بە بەردەوامی و مانەوەی ڕۆڵەكانی گەلەكەمانە لەسەر خاكی ڕۆژئاوا.



داوا لە خوشك و برایانمان دەكەم كە هێشتا لە ڕۆژئاوای كوردستاندا نیشتەجێن چیدی خاكەكەیان بەجێ نەهێڵن و چۆڵی نەكەن. چۆڵبوونی ڕۆژئاوای كوردستان لە بەرژەوەندیی نەیارانی گەلی كوردە و مافە ڕەواكانی گەلەكەمان دەخاتە ژێر مەترسییەوە. ئەو ئازیزانەی ناوچەكانیان كەوتووەتە بەر هێرش و شەڕی تێدایە ئەوە هەرێمی كوردستان ماڵی خۆیانە و باوەشی هەرێمی كوردستان كراوەیە بەڵام، پێویستە ئەو كوردانەی لە ناوچەكانی شەڕ و پێكدادان دوورن هەر لەسەر زێدی باب و باپیرانیان بمێننەوە و ئێمەش بە هەموو توانا و ئیمكانییەتی هەرێمی كوردستان لەڕووی دابینكردنی پێداویستییەكانی ژیان لە خزمەتیان داین و یارمەتییان دەدەین.





براتان: مسعود بارزانی

سەرۆكی هەرێمی كوردستان

22ـی 8ـی 2013