كونسوڵی ئەڵمانیا لە هەولێر رایدەگەیەنێت، لەماوەیەكی نزیكدا لە هەولێرەوە ڤیزای ئەڵمانیا بە هاونیشتیمانیانی هەرێمی كوردستان دەدرێت.

ئەمڕۆ چوارشەممە 21-8-2013، ئەلفرێد سیمس، كونسوڵی گشتی ئەڵمانیا لە هەولێر لەگەڵ بەهرۆز محەمەد ساڵح،پارێزگاری سلێمانی كۆبووەوە، لە كۆبوونەوەكەدا پارێزگاری سلێمانی داوای لە باڵیۆزخانەی ئەڵمانیا كرد هانی كۆمپانیا ئەڵمانییەكان بدات بۆ بنیاتنانی پڕۆژەی پیشەسازی لە شارە پیشەسازییەكان و دووپاتیكردەوە هەلومەرجێكی گونجاو هەیە بۆ سەرمایە گوزاری لەهەرێمی كوردستاندا.

لە تەوەرێكی دیكەی كۆبوونەوەكەدا گفتوگۆكرا لەبارەی ئاستەنگەكانی پێدانی ڤیزای ئەڵمانیاو پارێزگاری سلێمانی رایگەیاند ژمارەیەكی زۆری هاووڵاتی هەرێمی كوردستان گەشت بۆ ئەڵمانیا دەكەن بە تایبەت بۆ چارەسەركردنی هەندێك نەخۆشی و داوایكرد لەرووی پێدانی ڤیزاوە كارئاسانی بۆ هاووڵاتیان بكرێت.

لەبەرامبەردا كونسوڵی ئەڵمانیا لە هەولێر رایگەیاند، ئێستا سەرقاڵی زیادكردنی ستافەكەیانن و لە ماوەیەكی نزیكدا لە كونسوڵخانەی ئەڵمانیاوە لە هەولێر مامەڵەی ڤیزای هاووڵاتیان رایی دەكەن.













رووداو