مه‌سعود بارزانی سه‌رۆكی هه‌رێمی كوردستان له‌ نامه‌یه‌كدا داوا له‌ لیژنه‌ی ئاماده‌كاری كۆنگره‌ی نه‌ته‌وه‌یی ده‌كات لیژنه‌یه‌ك ره‌وانه‌ی رۆژئاوای كوردستان بكات بۆ لێكۆڵینه‌وه‌ له‌ راستی و به‌دواداچوون له‌و نه‌فیرعامه‌ی له‌لایه‌ن تیرۆریستانی سەر بە ئەلقاعیدە دژ به‌ خەڵكی مه‌ده‌نی بێتاوان راگه‌یه‌نداوه‌، ده‌شڵێت : ئەگەر هه‌واڵه‌كان راست بن ئەوە هەرێمی كوردستان ئامادەیە به‌رگری لە خەڵكی بێتاوانی كورد لە ڕۆژئاوا بكات.

دوای ئەوەی چەندین وێنەی دڵتەزێن و هەواڵی كوشتن و بڕین و هەڕەشەكردن لە هاووڵاتییە بێتاوانە كوردەكانی ڕۆژئاوای كوردستان لە دامودەزگەی ڕاگەیاندن و تۆڕە كۆمەڵایەتییەكان و سایتەكانی هەواڵ بڵاو بوویەوە، هەروەها باسی ڕاگەیاندنی نەفیرعام و جیهاد لە دژی كورد لە لایەن ڕێكخراوە تیرۆریستییەكانی سەر بە ئەلقاعیدە لە هەواڵەكاندا كرابوو.

سەرۆكی هەرێمی كوردستان لەپێناو لێكۆڵینەوە لەو ڕووداوانەوە و دەركەوتنی ڕاستییەكان نامەیەكی ئاڕاستەی كۆمیتەی ئامادەكاریی كۆنگرەی نەتەوەیی كردووە و تێیدا داوای پێكهێنانی لیژنەیەكی تایبەتی كردووە كە بچنە ڕۆژئاوا و بزانن ئەم هەواڵانە ڕاستن یان نا، ئەگەر ڕاست بن ئەوە هەرێمی كوردستان ئامادەیە به‌رگری لە خەڵكی بێتاوانی كورد لە ڕۆژئاوا بكات.

ئەمەی خوارەوە دەقی ئەو نامەیەیە:



بۆ لیژنەی ئامادەكاریی كۆنگرەی نەتەوەیی كورد



سڵاوێكی گەرم...



ماوەیەكە لە میدیاكان و هەندێ ناوەندی سیاسی و ڕاگەیاندنەكاندا كۆمەڵێك هەواڵ و دەنگۆ بڵاو بووەتەوە كە گوایە لە لایەن تیرۆریستانەوە لە ڕۆژئاوای كوردستان نەفیرعام لەدژی هاووڵاتیانی كورد ڕاگەیێندراوە و تیرۆریستانی سەر بە ئەلقاعیدە پەلاماری خەڵكی مەدەنی و بێتاوان دەدەن و سەری ژن و منداڵی كورد دەبڕن. بۆ دەركەوتنی ڕاستی و دروستیی ئەم هەواڵانە داواتان لێ دەكەم لیژنەیەكی تایبەت پێك بهێنن بۆ ئەوەی سەردانی ڕۆژئاوای كوردستان بكەن و لێكۆڵینەوە لەسەر ئەو هەواڵانە بكەن. ئەگەر بێتوو ئەم زانیاریانە ڕاست بن و هاووڵاتی و ژن و منداڵی بێتاوانی كورد لەژێر هەڕەشەی كوشتن و بڕین و تیرۆردا بن ئەوا هەرێمی كوردستان هەموو تواناكانی دەخاتە گەڕ بۆ ئەوەی بەرگری لە ژن و منداڵ و هاووڵاتی بێتاوانی كورد لە ڕۆژئاوای كوردستان بكات.



مسعود بارزانی

سەرۆكی هەرێمی كوردستان

8ـی 8ـی 2013