بەداخێكی زۆرەوە ئەمڕۆ هەواڵی كۆچی دوایی پێشمەرگە و رۆشنبیری خەباتكار مامۆستا (فەلەكەدین
كاكەیی)م پێگەیشت.
بەم بۆنە غەمناكەوە پرسە و سەرەخۆشی لە خۆمان و بنەماڵە بەڕێزەكەیان و دۆست و هەڤاڵانی و سەرجەم گەلی كوردستان دەكەم، ئەم كۆچە ناوادەیەی مامۆستا فەلەكەدین لە ناخەوە هەژاندمی و هەمووانی بە لە دەستدانی خەباتكارێكی بە ئەزموونیش غەمناك كرد، چونكە مامۆستا فەلەكەدین كەسایەتیەكی كوردستانی بوو، بە هزر و قەڵەمێكی نیشتمانیەوە لە پێناو سەركەوتنی خەباتی گەلی كوردستاندا تا دوا هەناسەی وچانی نەدا، مامۆستا بە هەست و بیرە مرۆڤدۆستیەكەیەوە هەمیشە لە هەوڵی قوڵكردنەوەی گیانی پێكەوەژیانی نەتەوەیی و ئاینی و سیاسیانەی خەڵكی كوردستان و تەنانەت گەلانی ناوچەكەدا بوو.
فەلەكەدین كاكەیی خەباتكار و سیاسیەكی بە ئەزموون و، مرۆڤێكی هێمن و لێبوردە و رۆشنبیر و نوسەرێكی كەم وێنە بوو، دوای مەرگە ناوادەكەشی پاشخانێكی گەورەی فەرهەنگیی و كولتوری بۆ ئێمەمانان و نەوەكانی داهاتوو بەجێهێشت و لە دنیای رۆشنبیری كوردیدا هەمیشە فەلەكەدین كاكەیی وەك ناوێكی پرشنگدار دەمێنێتەوە.
لە خوای گەورە داواكارم رەحمەتی بە بەهەشتی خۆی شاد بكات و سەبر و ئارامی بە هەموو لایەكمان ببەخشێت.

اناللە وانا الیە راجعون

مەسرور بارزانی
31-7-2013