٩ی‌ ته‌مموز/ یۆلیۆ (گوڵان میدیا)- دوێنێ دووشەمە لە سەڵاحەدین بەڕێز مەسعود بارزانی سەرۆكی هەرێمی كوردستان پێشوازی لە ستێفان بیركڕۆفت بالیۆزی ویلایەتە یەكگرتووەكانی ئەمەریكا لە عێراقی فیدڕاڵ و شاندێكی هاوڕێی كرد.

لە دیدارێكدا سەرەتا بالیۆزی ویلایەتە یەكگرتووەكانی ئەمەریكا خۆشحاڵیی خۆی بۆ ئەو دیدارە نیشاندا و پشتگیریی وڵاتەكەشی ڕاگەیاند بۆ سەردانی سەرۆك بارزانی بۆ بەغدا و كۆبوونەوەی بەڕێزیان لەگەڵ مالیكی و لایەنە سیاسییەكانی دیكەی عێراقی و بە دەستپێكێكی زۆر گونجاوی زانی بۆ چارەسەركردنی كێشەكانی نێوان هەرێم و بەغدا و هەروەها سەرجەم ئەو گرفتانەی لەنێو پڕۆسەی سیاسیی عێراقدا هەیە. لەو دیدارەدا بالیۆزی ویلایەتە یەكگرتووەكانی ئەمەریكا ئەوەشی نەشاردەوە كە كێشە و قەیرانەكانی عێراق زۆر قورسن و بە ئاسانی چارە ناكرێن بەڵام لەگەڵ ئەوەشدا ئەو هەنگاوی سەرۆكی هەرێمی كوردستان زۆر ئیجابیە و كاتیش لەبارە بۆ ئەوەی قسە لەسەر هەندێ كێشە بكرێن كە ڕیشەیین و سەرچاوەی قەیرانە سیاسییەكانن.

لای خۆیەوە سەرۆك بارزانی سوپاسی هاندان و پشتگیریی ویلایەتە یەكگرتووەكانی ئەمەریكای كرد و سەبارەت بە سەردانەكەی بۆ بەغدا سەرۆك بارزانی باسی ئەوەی كرد كە خەڵك چاوەڕوانییەكی زۆری هەیە كە سەردان و دانیشتنەكانی نێوان هەرێمی كوردستان و بەغدا ئەنجامی لێ بكەوێتەوە و ئەگەر بێتوو وەك پێشتر هەوڵەكان بێئەنجام بێت و كێشەكان وەك خۆی بمێننەوە ئومێدیش بۆ چارەسەریی گرفتەكان كەم دەبێتەوە. سەرۆك بارزانی سەردانی ئەم دوایەی خۆی و شاندی سیاسی و حكوومیی هەرێم بۆ بەغدا وەك دەرفەتێك زانی بۆ نەهێشتنی كێشەكان و ئەوەشی خستەڕوو كە لە كۆبوونەوەكانی لەگەڵ سەرۆك وەزیرانی عێراق و لایەنە سیاسییەكانی عێراق لەسەر بەردەوامبوونی گفتوگۆكان و دانانی سەقفی زەمەنی بۆ تاوتوێكردنی كێشەكان ڕێككەوتوون.

لە بەشێكی دیكەی ئەو دیدارە بارودۆخی سیاسیی ناوچەكە و قەیرانی سووریا و ژیان و گوزەرانی ئاوارەكانی سووریا لە هەرێمی كوردستان خرایە بەر باسەوە و بالیۆزی ویلایەتە یەكگرتووەكانی ئەمەریكا وێڕای ئاماژەپێدان بەو ژمارە زۆرەی پەنابەری سووریا كە ڕوویان كردووەتە هەرێمی كوردستان دەستخۆشی لە هەوڵەكانی حكوومەت و خەڵكی هەرێمی كوردستان كرد بۆ حەواندنەوە و یارمەتیدانی ئاوارەكانی سووریا.