جێگری سەرۆكی پەرلەمان پێشوازی لە پرۆفیسۆری یاریدەدەر دكتۆر ئەحمەد ئۆزتاش سەرۆكی زانكۆی ئیشقی نموونەیی كرد
لەدیدارێكدا كە دكتۆر عومر نورەدینی سەرۆكی لیژنەی پەروەردە و خوێندنی باڵای پەرلەمان ئامادەبوو،سەرۆكی زانكۆی ئیشقی نموونەیی خۆشحاڵی خۆی بەو دیدارە نیشان دا و ئەوەی راگەیاند كە ئەوان لەو باوەرە دانەبوون هەرێمی كوردستان بەم شێوەیە پێشكەوتوەو ئارامی و ئاسایشی تیا بەرقەرارە بۆیە لەماوەی ئەو چەند ساڵە توانیویانە لەرووی پەروەردەیی و پێگەیاندنی قوتابیان بەباشی كارەكانیان ئەنجام بدەن و نەوەی نوێ پێبگەێنن و لەو بارەوە بانگێشتی جێگری سەرۆكی پەرلەمان و پەرلەمانتارانی كرد بۆ بەشداربوون لەرێورەسمی دەرچوونی قوتابیانی زانكۆ كە بریارە لەرۆژی یەكشەممەی داهاتوو ئەنجام بدرێت.
لەلایەن خۆشیەوە دكتۆر حەسەن محەمەد سوورە جێگری سەرۆكی پەرلەمان بەگەرمی بەخێرهاتنی شاندەكەی كرد و دووپاتی كردەوە كە گەلی كوردستان بەدرێژای مێژوو گەلێكی ئاشتیخواز بوەو هەمیشە چاوی بریوەتە بنیادنانی باشترین پەیوەندی لەگەڵ نەتەوەو گەلانی تردا و ئێستاش هەرێمی كوردستان بەهۆی ئەو سیاسەتە حەكیمانەی كە سەركردایەتیەكەی پەیرەوی دەكات توانیویەتی جوانترین نموونەی پێكەوە ژیانی ئاشتیانە و برایانەی نێوان گەل و نەتەوەو ئاینە جیاوازەكان نیشان بدات چونكە هەمیشە ئاشتیخوازبوە، هاوكات جێگری سەرۆكی پەرلەمان وێرای ستایشی زانكۆی ئیشق و ئەو رۆڵە بەرچاوانەی لەپێناو لێك گەیشتن و لێك نزیككردنەوەی هەردوو گەلی برا هاویشتویەتی هیوای سەركەوتنی بۆ خواستن.
